صدام حسین اور معمر قذافی بھی انتخابات میں فتح حاصل کرتے تھے: راہل گاندھی

بھارت میں جمہوری معیاروں کے گرنے کی بین الاقوامی رپورٹ کا حوالہ دیتے ہوئے کانگریس کے سابق صدر راہل گاندھی نے وزیر اعظم نریندر مودی کی زیرقیادت حکومت کو بالواسطہ نشانہ بنایا ہے۔

کانگریس رہنما راہل گاندھی نے منگل کے روز ایک پروگرام میں کہا کہ عراق کے ڈکٹیٹر صدام حسین اور لیبیا کے معمر قذافی نے بھی انتخابات میں کامیابی حاصل کی تھی۔

راہل نے اپنے آن لائن خطاب کے دوران کہا کہ صدام حسین اور قذافی کے اقتدار میں بھی انتخابات ہوا کرتے تھے۔ انتخابات میں ان کی جیت بھی ہوتی تھی۔ ایسا نہیں تھا کہ لوگ ووٹ نہیں دیتے تھے لیکن ان کے ووٹوں کے تحفظ کے لئے کوئی ادارہ جاتی ڈھانچہ موجود نہیں تھا۔ راہل نے یہ جواب براؤن یونیورسٹی کے پروفیسر آشوتوش وارشنیہ ، دیگر فیکلٹی ممبران اور طلباء کے ساتھ بات چیت کے دوران دیا۔

راہل نے کہا کہ انتخاب صرف یہ نہیں ہے کہ لوگ جاکر بٹن دبائیں اور حق رائے دہی کا استعمال کریں۔ الیکشن ایک تصور ہے، الیکشن ایک ادارہ ہے ، جو اس بات کو یقینی بناتا ہے کہ ملک کا ڈھانچہ صحیح طریقے سے کام کر رہا ہے۔

الیکشن یہ ہے کہ عدلیہ غیرجانبدار ہو اور پارلیمنٹ میں بحث کرائی جاتی ہو لہذا کسی بھی ووٹ کی گنتی کے لئے یہ چیزیں ضروری ہیں۔ کانگریس قائد کا بیان ایک ایسے وقت میں آیا ہے جب انہوں نے سویڈش کے ایک ادارے کی رپورٹ کا ذکر کرتے ہوئے کہا تھا کہ بھارت اب ایک جمہوری ملک نہیں ہے۔

انہوں نے کچھ دن پہلے پروفیسر کوشک باسو سے گفتگو کے دوران کہا تھا کہ اندرا گاندھی کے دوران نافذ کی گئی ایمرجنسی غلط تھی لیکن اب یہ ملک اس سے بھی بدتر مرحلے میں ہے۔

ملک کے اداروں میں ایک خاص نظریہ کے لوگوں کی مداخلت کو تقویت ملی ہے۔ سویڈش ادارے کی رپورٹ میں کہا گیا ہے کہ وزیر اعظم نریندر مودی کے اقتدار سنبھالنے کے بعد ہی جمہوری آزادی میں کمی آئی ہے۔