جمیعت علما ہند نے ایک بیان جاری کرتے ہوئے ادے پور قتل معاملہ کی مذمت کی اور لوگوں سے علاقے میں امن برقرار رکھنے کی اپیل کی ہے۔ جمیعت علما ہند کے جنرل سکریٹری مولانا حکیم الدین قاسمی نے ادے پور قتل معاملہ پر شدید ردعمل کا اظہار کرتے ہوئے کہا کہ اہانت رسول کے نام پر اس طرح کا قتل کسی بھی صورت میں جائز نہیں ہے، ہم اس کی واضح طور پر مذمت کرتے ہیں۔ انہوں نے اپنے بیان میں کہا کہ یہ اسلام اور ملک کے آئین کے خلاف ہے۔ jamiat ulema e hind react on Udaipur murder case
انہوں نے مزید کہا کہ اس طرح کے واقعات کو کسی بھی صورت میں جائز قرار نہیں دیا جا سکتا، یہ سراسر اسلام اور آئین کے خلاف ہے۔ ملک میں ایک نظام قائم ہے، جس کے تحت تمام شہریوں کو زندگی گزارنی ہے اور کسی بھی شخص کو یہ حق حاصل نہیں ہے کہ وہ قانون کو اپنے ہاتھ لے۔ انہوں نے لوگوں سے امن برقرار رکھنے کی اپیل کی ہے۔
آل انڈیا مسلم پرسنل لا بورڈ نے ایک پریس نوٹ جاری کرتے ہوئے اس واقعہ کی مذمت کی اور لوگوں سے قانون کے مطابق زندگی گرازنے کی اپیل کی ہے۔ آل انڈیا مسلم پرسنل لا بورڈ کے جنرل سکریٹری مولانا خالد سیف اللہ رحمانی نے پریس نوٹ میں کہا کہ کسی بھی مذہبی مقدس شخصیت کی شان میں گستاخی کرنا ایک سنگین جرم ہے۔ بی جے پی کی سابق ترجمان نوپور شرما کے قابل اعتراض بیان نے مسلمانوں کے جذبات کو مجروح کیا ہے لیکن قانون کو اپنے ہاتھ میں لینا اور کسی شخص کو بطور خود مجرم قرار دے کر قتل کردینا نہایت قابل مذمت حرکت ہے۔ اس طرح کی حرکت کا اسلام اور قانون بالکل اجازت نہیں دیتا۔ بورڈ مسلمانوں سے اپیل کرتا ہے کہ وہ ہرگز قانون کو اپنے ہاتھ میں نا لے اور ایسے کسی بھی عمل سے پرہیز کریں جو سماجی یکجہتی کو متاثر کرے۔
جماعت اسلامی ہند نے ادے پور قتل معاملہ کی سخت مذمت کی ہے۔ جماعت اسلامی نے کہا کہ یہ واقعہ سفاکانہ و وحشانہ ہے اور اسلام میں تشدد کی کوئی گنجائش نہیں ہے۔ کوئی بھی شہری قانون کو اپنے ہاتھ میں نا لے اور مجرمین کو ملک کے قانون کے مطابق سزا دی جائے۔ ملک میں امن کو برار رکھنا تمام شہری کی ذمہداری ہے۔
مسلم پرسنل لا بورڈ کے رکن اور معروف عالم دین مولانا خلیل الرحمان سجاد نعمامی نے ایک مذمتی بیان جاری کرتے ہوئے کہا کہ اس طرح کے واقعات کا اسلام سے کوئی تعلق نہیں ہے، یہ ایک جاہلانہ اور جنونی والا قدم ہے اور اسی طرح صحافی محمد زبیر کی گرفتاری بھی قابل مذمت ہے، انہوں نے تمام لوگوں سے امن و شانتی برقرار رکھنے کی اپیل کی ہے۔
راجستھان میں اجمیر درگاہ شریف کے دیوان سید زین العابدین نے اس واقعہ کی مذمت کرتے ہوئے کہا کہ اسلام کبھی کسی سے نفرت نہیں سکھاتا۔ ادے پور میں قتل کے واقعہ کی جتنی مذمت کی جائے کم ہے۔ انہوں نے حکومت سے مجرمین کو سخت ترین سزا دینے کا مطالبہ کیا۔ انہوں نے مزید کہا کہ ایسے نوجوانوں کے بیانات کی میڈیا پر تشہیر نہیں کرنی چاہئے اور اگر کہیں بھی ایسے بیانات کی تشہیر ہوتی نظر آئے تو انہیں فوری طور پر روکا جائے۔
ادے پور قتل معاملہ پر متعدد مذہبی و سیاسی جماعتوں کا ردعمل آل انڈیا مجلس اتحاد المسلمین نے بھی اس واقعہ کی مذمت کی اور مجرمین کو سخت سے سخت سزا دلانے کی اپیل کی ہے۔ ایم آئی ایم کے قومی صدر اسد الدین اویسی نے ٹویٹ کرتے ہوئے لکھا کہ ادے پور میں ہونے والا قتل قابل مذمت ہے، ہماری پارٹی کا مسلسل نقطہ نظر یہی ہے کہ کسی بھی شخص کو قانون کو اپنے ہاتھ میں لینے کا کوئی حق نہیں ہے، ہم نے ہمیشہ تشدد کی مخالفت کی ہے۔ انہوں نے مزید کہا کہ ہم حکومت سے مطالبہ کرتے ہیں کہ حکومت مجرمین کے خلاف سخت سے سخت کارروائی کرے اور ملک میں لا اینڈ آرڈر کو قائم رکھے۔
راجستھان کے وزیراعلی اشوک گہلوت نے ٹویٹ کرکے لوگوں سے امن برقرار رکھنے کی اپیل کی ہے، انہوں نے کہا کہ ادے پور قتل معاملہ کے دونوں مجرمین کو راجسمند سے گرفتار کیا گیا ہے۔ اس کیس کی تفتیش کیس آفیسر سکیم کے تحت کی جائے گی اور تیز رفتار تحقیقات کو یقینی بنا کر مجرموں کو عدالت میں سخت سے سخت سزا دلائی جائے گی۔ انہوں نے عوام سے امن برقرار رکھنے اور واقعہ کی ویڈیو شیئر نہ کرنے کی اپیل کی ہے۔
دہلی کے وزیراعلی اور عام آدمی پارٹی کے قومی صدر اروند کجریوال نے اس واقعہ پر شدید ردعمل کا اظہار کرتے ہوئے کہا کہ ادے پور کا واقعہ انتہائی ہولناک اور لرزہ خیز ہے۔ مہذب معاشرے میں ایسی گھناؤنی حرکتوں کی کوئی جگہ نہیں۔ ہم اس کی شدید الفاظ میں مذمت کرتے ہیں۔ اس جرم کے مرتکب افراد کو سخت سے سخت سزا دی جائے۔
مزید پڑھیں:۔Youth Murdered in Udaipur: ادے پور قتل معاملہ، راجستھان میں انٹرنیٹ خدمات معطل، ایک ماہ کے لیے دفعہ 144 نافذ
واضح رہے کہ اُدے پور شہر کے دھان منڈی تھانہ علاقے میں منگل کے روز دن دہاڑے ایک شخص کا قتل کر دیا گیا۔ واقعہ شہر کے مالداس اسٹریٹ علاقے میں پیش آیا۔ بتایا جا رہا ہے کہ مذکورہ شخص نے بی جے پی کی سابق قومی ترجمان نُپور شرما کے حق میں پوسٹ کی تھی حالانکہ پولیس کا کہنا ہے کہ یہ واردات آپسی رنجش کی وجہ سے انجام دی گئی ہے۔
