کسان تحریک کو دس سال بھی چلانی پڑے تو ہم چلائیں گے: راکیش ٹکیت

کسان رہنما راکیش ٹکیت نے کہا کہ ہم دعا کرتے ہیں کہ گزشتہ دس مہینوں سے حکومت نے جس طرح سے کسانوں کو ہراساں کیا ہے، خدا انہیں اچھی سمجھ دے۔

ریاست اترپردیش کے ضلع مظفرنگر کے مرکزی چوراہے پر واقع شیو شنکر شوالے پر کسان رہنما راکیش ٹکیت نے 51 کیلو پیتل کا گھنٹہ پیش کر کے نو مہینے کے بعد ضلع میں اپنی موجودگی کا احساس دلایا۔

اس خاص موقع پر راکیش ٹکیت اپنے پورے خاندان اور بھارتیہ کسان یونین کے کارکنان کے ساتھ موجود تھے، ان کے پروگرام کے پیش نظر ضلع پولیس انتظامیہ بھی پوری طرح مستعد نظر آئی۔

راکیش ٹکیت اپنے قافلہ کے ساتھ شام تقریبا آٹھ بجے شیو چوک پہنچے جہاں کسان کارکنان اور عہدے داروں نے ان کا گرم جوشی کے ساتھ استقبال کیا، یہاں پر راکیش ٹکیت نے رسم ادا کرتے ہوئے 51کلو پیتل کا گھنٹہ مندر پر چڑھایا۔

اس موقع پر انہوں نے کہا کہ ہم دعا کرتے ہیں کہ گزشتہ دس مہینوں سے حکومت نے جس طرح سے کسانوں کو ہراساں کیا ہے، خدا انہیں اچھی سمجھ دے۔

انہوں نے کہا کہ جب سے بی جے پی کی حکومت آئی ہے تب سے سادھو و سنتوں کا قتل ہو رہا ہے اب تک تقریبا 24 کے سادھووں کا قتل کیا جا چکا ہے، انہوں نے کہا کہ اس تحریک کو تقریبا دس مہینے ہو چکے ہیں، اگر اس تحریک کو دس سال بھی چلانی پڑے تو ہم چلائیں گے۔