راجستھان کے باڑمیر میں فضائیہ کا کارگو سی -130 جے سپر ہرکیولس طیارہ جمعرات کو وزیر دفاع راج ناتھ سنگھ اور روڈ ٹرانسپورٹ کے وزیر نتن گڈکری کو لے کر پہلی بار قومی شاہراہ پر اترے گا۔
فضائیہ کے طیاروں کو ہنگامی صورتحال میں قومی شاہراہوں پر اتارنے کی مشق کے تحت یہ اہتمام کیا جارہا ہے۔ اس کے علاوہ فضائیہ کا لڑاکا طیارہ سکھوئی 30 بھی اسی مشق کے تحت ہائی وے پر اترنے کے ساتھ ہی دوبارہ پرواز کرنے کی مشق کرے گا۔ اڑ میر میں واقع اس قومی شاہراہ پر سکھوئی 30 طیاروں نے آج بھی اترکر دوبارہ پرواز کرنے یا ٹچ ڈاؤن کی مشق کی۔
وزارت دفاع کے مطابق وزیر دفاع اس کے بعد باڑمیر اور جیسلمیر میں تیاریوں کا جائزہ لیں گے۔ وہ سطح سے ہوا میں مار کرنے والے درمیانی دوری کے میزائل کو بیڑے میں شامل کئے جانے کی تقریب میں بھی شرکت کریں گے۔ جیسلمیر میں فضائیہ کے افسران اور جوانوں سے بھی بات چیت کریں گے۔
یہ ہندوستان کی پہلی قومی شاہراہ ہے جسے آئی اے ایف طیاروں کی ہنگامی لینڈنگ کے لیے استعمال کیا جاتا ہے۔ اکتوبر 2017 میں آئی اے ایف کے لڑاکے طیاروں اور ٹرانسپورٹ طیاروں نے لکھنؤ-آگرہ ایکسپریس وے پر لینڈنگ کی مشق کی تھی تاکہ یہ ظاہر کیا جاسکے کہ ایسی شاہراہوں پر ایم اے ایف کے طیارے ہنگامی صورت حال میں لینڈنگ کے لیے استعمال کرسکتے ہیں یا نہیں۔لکھنؤ-آگرہ ایکسپریس وے اتر پردیش حکومت کے تحت آتا ہے۔