بھارتی ریلوے نے آئندہ کچھ دنوں میں کووڈ سے قبل کی طرح تمام مسافر ریلوے خدمات کو پرانے ٹائم ٹیبل کے مطابق بحال کرنے کا فیصلہ کیا ہے۔
ریلوے بورڈ نے اس سلسلہ میں ایک سرکلر تمام زونل ریلوے کے پرنسپل چیف کمرشل منیجروں کو جاری کیا ہے۔ اس سرکلر میں کہا گیا ہے کہ ٹائم ٹیبل کے مطابق تمام باقاعدہ سپرفاسٹ، میل ایکسپریس، اور پسنجر گاڑیوں کو چلانا شروع کیا جائے گا۔ ان گاڑیوں کے پرانے نمبر بحال ہوں گے اور پہلے یہ جن زمروں کے تحت چلتی تھیں اسی زمرہ اور اسی کرایہ کی شرح کے حساب سے ٹکٹ جاری کیے جائیں گے۔
ریلوے کے سرکاری ذرائع کے مطابق اس وقت 1744 گاڑیاں اسپیشل نمبر سے چلائی جارہی ہیں۔ آئندہ کچھ دنوں میں ان کے نمبر سے صفر ہٹا دیا جائے گا اور انہیں پرانے نمبروں سے چلایا جائے گا۔
کووڈ سے قبل کی طرح ریلوے سروسز بحال کرنے کے احکامات اسپیشل نمبر ہونے کی وجہ سے کچھ گاڑیوں میں زیادہ کرایہ لیا جارہا تھا وہ بھی پہلے کی طرح ہو جائیں گے۔ حالانکہ ذرائع نے یہ بھی کہا کہ غیر ریزرو جنرل زمرہ کے کوچ میں غیر ریزرو ٹکٹ جاری نہیں کئے جائیں گے اور کووڈ پروٹوکول پر مکمل طور پر عمل درآمد کیا جائے گا۔
گاڑیوں میں پہلے کی طرح کھانے پینے کا انتظام، چادر تکیہ کمبل دینے، کرایہ میں پرانی رعایتیں بحال کرنے کے بارے میں پوچھے جانے پر انہوں نے کہا کہ ابھی کووڈ پروٹوکول نافذ رہے گا اور فی الحال اس میں کوئی تبدیلی نہیں ہوگی۔
یہ بھی پڑھیں
خیال رہے کہ کووڈ وبا کی وجہ سے 20مارچ 2020 کو ریلوے مسافر خدمات بند کر دی گئیں تھیں۔ بعد میں کئی مہینہ بعد اسپیشل نمبر سے کم از کم تعداد میں گاڑیوں کو مخصوص شرائط کے ساتھ شروع کیا گیا تھا۔ آہستہ آہستہ ان شرائط میں وبا کی صورتحال میں تبدیلی کے ساتھ نرمی دی گئی اور اب گاڑیوں سے اسپیشل نمبر ہٹانے اور جنرل کرایہ بحال کرنے کا فیصلہ کیا گیا ہے۔
