راہل کو چھتیس گڑھ آنے کی دعوت دی: بگھیل

چھتیس گڑھ کی قیادت میں تبدیل پر چل رہی بات چیت کے درمیان کانگریس کے سابق صدر راہل گاندھی کے ساتھ میٹنگ کے بعد وزیراعلی بھوپیش بگھیل نے کہاکہ انہوں نے مسٹر گاندھی کو ساری صورتحال سے واقف کرا دیا ہے اور انہیں اگلے ہفتہ چھتیس گڑھ آنے کی دعوت بھی دی ہے۔

راہل گاندھی کے ساتھ تقریباً ساڑھے تین گھنٹے کی میٹنگ کے بعد مسٹر بگھیل نے کہاکہ انہوں نے پارٹی کے سابق صدر کو ساری بات بتا دی ہے اور مسٹر گاندھی نے انکی باتوں کی توجہ کے ساتھ سنا ہے۔ میٹنگ میں ریاست کے انچارج جنرل سکریٹری پی ایل پونیا کے ساتھ ہی پارٹی کی اترپردیش کی انچارج جنرل سکریٹری پرینکا گاندھی واڈرا بھی موجود رہیں۔ بتایا جارہا ہے کہ محترمہ واڈرا تقریباً ڈیڑھ گھنٹے تک میٹنگ میں رہیں۔

مسٹر بگھیل نے کہاکہ مسٹر گاندھی نے انہیں چھتیس گڑھ کے وزیراعلی کے طورپر دہلی بلایا تھا اور اس لئے وہ اپنے لیڈر سے ملاقات کے لئے آئے۔ انہوں نے ریاست سے جڑے سیاسی اور انتظامی امور پر بھی مسٹر گاندھی سے بات چیت کی۔ ان کا کہنا تھا کہ انہوں نے وزیراعلی کی حیثیت سے مسٹر گاندھی کو چھتیس گڑھ آنے کی دعوت دی ہے اور مسٹر گاندھی نے ان کی دعوت کو قبول کرکے اگلے ہفتہ رائے پور آنے کی بات کہی ہے۔

یہ پوچھے جانے پر کہ انکی کابینہ میں وزیر صحت ٹی ایس سنگھ ڈھائی ڈھای برس وزیراعلی رہنے کے فارمولے پر انہیں ہٹانے کی مانگ کررہے ہیں تو مسٹر بگھیل نے کہاکہ معاملہ اعلی کمان کے سامنے ہے۔ میں نے جو کچھ کہنا تھا وہ سب راہل جی کو بتا دیا ہے۔

میٹنگ کے بعد مسٹر بگھیل نے پارٹی ہیڈکوارٹر پہنچے چھتیس گڑھ کے اراکین اسمبلی سے بھی ملاقات کی۔ بتایا جارہا ہے کہ چھتیس گڑھ کے آٹھ وزیر اور 53 اراکین اسمبلی دہلی پہنچے ہیں۔ ان تمام اراکین اسمبلی کو مسٹر بگھیل کا حامی سمجھا جارہا ہے۔ مسٹر بگھیل نے یہ بھی کہا کہ انہیں اعلی کمان نے دہلی بلایا تھا اور ان کے کہنے پر وہ دہلی آئے۔ مسٹر گاندھی سے وزیراعلی کی اس ہفتہ یہ دوسری ملاقات ہے۔

یو این آئی