نئی دہلی:کانگریس پارٹی کے سابق صدر راہل گاندھی نے بدھ کو بلقیس بانو کیس میں عصمت دری اور قتل کے 11 قصورواروں کی رہائی پر وزیر اعظم نریندر مودی پر حملہ کیا۔ راہل گاندھی نے الزام لگایا کہ پورا ملک وزیر اعظم کے قول و فعل میں تضاد دیکھ رہا ہے۔ دراصل یوم آزادی کے موقع پر لال قلعہ کی فصیل سے قوم سے اپنے خطاب میں وزیراعظم نے کہا تھا کہ خواتین کا احترام بھارت کی ترقی کا ایک اہم ستون ہے۔ انہوں نے 'ناری شکتی' کی حمایت کرنے کی ضرورت پر زور دیا تھا۔ Rahul Gandhi targets modi govt on the release of the convicts
گجرات میں بلقیس بانو گینگ ریپ کیس میں عمر قید کی سزا پانے والے تمام 11 مجرموں کو پیر کو رہا کر دیا گیا۔ وہیں اس معاملے پر راہل گاندھی نے حکومت کو نشانہ بنایا ہے۔ انہوں نے سوشل میڈیا پر ٹوئٹ کرتے ہوئے کہا کہ جن لوگوں نے پانچ ماہ کی حاملہ خاتون کی عصمت دری کی اور اس کی تین سالہ بچی کو قتل کیا، انہیں 'آزادی کے امرت مہوتسو' کے دوران رہا کر دیا گیا۔ خواتین کی طاقت کی بات کرنے والے ملک کی خواتین کو کیا پیغام دے رہے ہیں؟ پورا ملک وزیراعظم کے قول و فعل میں تضاد دیکھ رہا ہے۔