کانگریس کے سابق صدر راہل گاندھی نے چین کی دراندازی کے سلسلے میں فوجی سطح پر ہونے والی بات چیت کو بے معنی قرار دیتے ہوئے اسے وقت کا ضیاع بتایا۔ انہوں نے کہا ہے کہ اس سے قومی سلامتی خطرے میں پڑ گئی ہے۔
راہل گاندھی نے پیر کو ٹویٹ کیا کہ ’’گوگرا ہاٹ اسپاٹ اسپرنگ اور ڈیپسانگ پلینس پر چینی فوج کے قبضہ سے بھارت کے اسٹریٹجک مفادات کے ساتھ ساتھ ڈی بی او ہوائی پٹی کو بھی براہ راست خطرہ لاحق ہے۔ حکومت کی بے مقصد بات چیت سے قومی سلامتی بڑے پیمانے پر متاثر ہوئی ہے۔ ہم اس سے بہتر کام کرنے کے اہل ہیں۔''
کانگریس نے چین سے متصل سرحد پر، امن سے متعلق چینی فوج کی وعدہ خلافی کی خبروں پر حکومت پر تنقید کرتے ہوئے الزام لگایا کہ اس نے بے معنی بات چیت کے ساتھ سرحد پر چین کے سامنے ہتھیار ڈال دیئے اور قومی سلامتی کے ساتھ سمجھوتہ کررہی ہے۔
انہوں نے کہا کہ میڈیا رپورٹس کے مطابق چینی فوج سرحد پر اسٹریٹجک اہمیت کے حامل مختلف خطوں سے پیچھے نہیں ہٹ رہی ہے۔ اس سلسلے میں چین کی فوج اور بھارتی فوج کے مابین 9 اپریل کو ہوئے آخری دور کے مذاکرات کے دوران، چینی فوج نے اسٹریٹجک اہمیت کی حامل کئی چوکیوں سے پیچھے ہٹنے سے انکار کر دیا ہے۔
(یو این آئی)