راہل گاندھی نے اپوزیشن لیڈروں کو چائے پر دعوت دی

کانگریس کے سابق صدر راہل گاندھی نے منگل کو اپوزیشن لیڈروں کو چائے پر دعوت دی ہے۔ جس سے پارلیمنٹ میں جاری تعطل کے ساتھ ساتھ کئی دیگر مسائل پر بات چیت کی امید ہے۔

کانگریس ذرائع نے بتایا کہ اپوزیشن قائدین کو کل صبح پارلیمنٹ کی کاروائی شروع ہونے سے پہلے چائے پر بلایا گیا ہے تاکہ رکن پارلیمنٹ وقت پر پہنچ سکے۔ تمام 14 ہم خیال جماعتوں کے قائدین کو چائے پر مدعو کیا گیا ہے۔

راہل گاندھی نے جمعہ کو ان تمام 14 اپوزیشن جماعتوں کے قائدین کے ساتھ بھی ملاقات کی۔ اپوزیشن جماعتوں کی آخری میٹنگ پارلیمنٹ میں راجیہ سبھا میں اپوزیشن لیڈر ملیکا ارجن کھڑگے کے چیمبر میں بلائی گئی تھی۔

واضح رہے کہ اپوزیشن کے ارکین مانسون سیشن کے آغاز سے ہی پیگاسس جاسوسی اور کسانوں کے مسائل جیسے امور پر پارلیمنٹ میں احتجاج کر رہے ہیں جس کی وجہ سے ایوان کی کارروائی نہیں چل پا رہی ہے۔ اپوزیشن اراکین اس معاملے پر حکومت سے پارلیمنٹ میں جواب طلب کر رہے ہیں۔

(یو این آئی)