کانگریس کے سابق صدر راہل گاندھی نے کہا ہے کہ ملک کی معاشی زبوں حالی کے پیش نظر سمجھ میں نہیں آتا کہ وزیراعظم نریندر مودی کی قیادت میں ترقی ہو رہی یا زوال ہو رہا ہے۔
مہنگائی پر راہل گاندھی کا طنز راہل گاندھی نے بدھ کے روز کہا کہ مجموعی گھریلو پیداوار۔ جی ڈی پی تو پہلے سے زوال پذیر اور بے روزگاری اعلیٰ سطح پر تھی لیکن اب مہنگائی بھی آسمان چھونے لگی ہے۔ بینک مصیبت میں آ گئے ہیں اور عوام کا پیسہ بینکوں میں پھنس گیا ہے۔
انہوں نے سماجی صورتحال کے سلسلے میں بھی حکومت کو ہدف تنقید بنایا اور کہا کہ سماجی انصاف جس طرح سے کچلا جا رہا ہے اور اس سے جو حالات بن رہے ہیں، انھیں دیکھتے ہوئے عوام کا حوصلہ ٹوٹ رہا ہے۔ حکومت سے ان کا اعتماد اٹھ رہا ہے۔
راہل گاندھی نے ٹویٹ کیا کہ ’ بینک مصیبت میں ہیں اور جی ڈی پی بھی۔ مہنگائی اتنی زیادہ کبھی نہیں تھی، نہ ہی بے روزگاری۔ عوام کا حوصلہ ٹوٹ رہا ہے اور سماجی انصاف ہر دن کچلا جا رہا ہے۔ ترقی یا زوال‘۔