بنگال میں ممتا اور راہل کی ریلیاں منسوخ، شاہ اور نڈا کی ریلیاں جاری

ملک بھر میں کورونا کے بڑھتے کیسز، ہسپتالوں میں سہولیات نہ ہونے کے باعث لوگوں کی کورونا سے اموات، شمشان اور قبرستانوں میں لاشوں کا انبار، لوگوں میں دہشت کا ماحول ہے، اس کے باوجود بھی بی جے پی کی اعلی قیادت انتخابی جلسوں اور ریلیوں میں مصروف ہے۔

ملک کی دوسری ریاستوں کی طرح مغربی بنگال میں بھی کورونا وائرس کی دوسری لہر کے سبب نئے کیسز میں زبردست اضافہ ہوا ہے۔

وہیں مغربی بنگال میں چھٹے مرحلے کے لیے 22 اپریل کو ووٹنگ ہونی ہے۔ سیاسی پارٹیاں اپنی اپنی تیاریوں میں مصروف ہیں، راہل گاندھی نے ریلیاں منسوخ کرنے کا اعلان کیا ہے جبکہ بنگال کی وزیر اعلی ممتا بنرجی نے بھی عوامی جلسہ جلوس میں شرکت نہ کرنے کا فیصلہ کیا ہے۔

گذشتہ روز کانگریس کے رہنما راہل گاندھی نے کووڈ-19 کی صورتحال کے پیش نظر مغربی بنگال میں اپنی تمام عوامی ریلیاں منسوخ کر دی ہیں۔ انہوں نے دیگر سیاسی رہنماؤں سے بھی اپنے عوامی جلسوں کو منسوخ یا ملتوی کرنے کی اپیل کی۔

ترنمول کانگریس کی سربراہ ممتا بنرجی نے کورونا وائرس کے مدنظر دارالحکومت کولکاتا میں بڑے جلسہ و جلوس میں شرکت نہ کرنے کا فیصلہ کیا ہے۔

لیکن دوسری طرف مرکزی وزیر داخلہ امت شاہ آج بنگال میں چار انتخابی جلسوں سے خطاب کریں گے۔ شاہد بنگال میں روڈ شو بھی کریں گے۔

وہیں بی جے پی کے قومی صدر جے پی نڈا بھی بنگال میں کورونا کے بڑھتے معاملات کے دوران دو روڈ شوز، جلسہ اور ایک میٹنگ میں شرکت کریں گے۔