پرینکا گاندھی کا انصاف کی لڑائی میں پہلوانوں کے ساتھ آخری دم تک کھڑی رہنے اعلان

Priyanka Gandhi meets wrestlers کانگریس کی رہنما پرینکا گاندھی نے احتجاج کرنے والے پہلوانوں سے ملاقات کے بعد انہیں اپنی مکمل حمایت کا یقین دلایا اور کہا کہ وہ آخری دم تک ان کی لڑائی میں کھڑی رہیں گی۔ برج بھوشن شرن سنگھ کے ساتھی سنجے سنگھ کے نیا صدر منتخب ہونے کے بعد سے ساکشی نے ریٹائرمنٹ اور بجرنگ پونیا نے پدم شری ایوارڈ واپس کرنے کا اعلان کر دیا ہے۔

نئی دہلی: کانگریس کی جنرل سکریٹری پرینکا گاندھی نے جمعہ کو پہلوان ساکشی ملک اور بجرنگ پونیا سے ان کی رہائش گاہ پر ملاقات کرکے انھیں اپنی مکمل حمایت کا یقین دلایا اور کہا کہ وہ آخری دم تک ان کی لڑائی میں کھڑی رہیں گی۔ اکیس دسمبر کو ریسلنگ فیڈریشن آف انڈیا (WFI) کے انتخاب میں برج بھوشن شرن سنگھ کے ساتھی سنجے سنگھ کے نیا صدر منتخب کیا گیا، جس سے ناراض خاتون پہلوان ساکشی ملک نے کشتی سے ریٹائرمنٹ کا اعلان کردیا۔

پہلوانوں کے ساتھ میٹنگ سے باہر آنے کے بعد کانگریس لیڈر پرینکا گاندھی نے صحافیوں سے بات کرتے ہوئے کہا کہ میں یہاں ایک خاتون کے طور پر آئی ہوں کیونکہ مجھے لگتا ہے کہ ان لڑکیوں کے ساتھ جو کچھ ہوا ہے وہ قابل نفرت ہے۔ کانگریس لیڈر دیپندر ہڈا بھی پرینکا گاندھی کے ساتھ ایک پہلوان کی رہائش گاہ پر گئے تھے۔ دیپندر ہڈا نے بتایا کہ پرینکا گاندھی نے پہلوانوں کو یقین دلایا کہ وہ انصاف کی لڑائی میں آخری دم تک کھڑی رہیں گی۔ ہڈا نے مزید کہا کہ پرینکا جی نے انہیں بتایا کہ کانگریس ان کے ساتھ ہے۔ ہماری خواتین پہلوانوں کے ساتھ جو سلوک ہوا ہے اس پر پوری قوم غمزدہ ہے۔ یہ بدقسمتی کی بات ہے۔ ہم نے انہیں مکمل حمایت کا یقین دلایا۔

دریں اثنا، مشہور پہلوان بجرنگ پونیا نے جمعہ کو اعلان کیا کہ وہ ڈبلیو ایف آئی کے سابق سربراہ برج بھوشن شرن سنگھ کے معاون کو فیڈریشن کا صدر منتخب ہونے کے بعد اپنا پدم شری واپس کر دیا۔ بجرنگ پونیا نے صحافیوں کو بتایا کہ جیسا کہ میں نے پہلے کہا ہے کہ ہم اپنی بیٹیوں اور بہنوں کے لیے لڑ رہے تھے، میں ان کے لیے انصاف نہیں کر سکا، اس وجہ سے میں سمجھتا ہوں کہ میں اس اعزاز کا حقدار نہیں ہوں۔

انھوں نے مزید کہا کہ میں یہاں اپنا ایوارڈ واپس کرنے آیا تھا، تاہم پی ایم کے ساتھ میری ملاقات نہ ہو سکی کیونکہ میری ملاقات کا وقت نہیں تھا، پی ایم کا مصروف شیڈول ہے۔ میں یہ تمغہ اپنے گھر نہیں لے جاؤں گا اس لئے میں اسے وسطی دہلی میں کرتویہ پاتھ کے قریب فرش پر رکھ دیا ہے۔ واضح رہے کہ بجرنگ پونیا اور ساکشی ملک پہلوانوں کی طرف سے برج بھوشن شرن سنگھ کے خلاف جنسی ہراسانی کے الزامات کے خلاف احتجاج کا حصہ تھے۔