حکمراں جماعت ترنمول کانگریس اور لفٹ فرنٹ نے اپنے اپنے امیدواروں کے ناموں کا اعلان کر دیا ہے جبکہ کانگریس اور بی جے پی کی جانب سے اب تک امیدواروں کے ناموں کا اعلان نہیں کیا گیا ہے۔
شمالی 24 پرگنہ کے کھردہ اسمبلی حلقے سے ترنمول کانگریس کے سینئر رہنما اور وزیر شوبھن دیب ناتھ چٹرجی امیدوار ہیں جبکہ سی پی آئی ایم نے سجیت کو انتخابی میدان میں اتارنے کا اعلان کیا ہے۔
کھردہ اسمبلی حلقے پر ترنمول کانگریس کا قبضہ تھا۔ اسمبلی انتخابات 2021 سے عین قبل رکن اسمبلی کاجل سنہا کی موت کے بعد اس حلقے کے لئے انتخابات نہیں ہو پائے تھے۔
یہ بھی پڑھیں:
ترنمول کانگریس کی سربراہ ممتا بنرجی کی نندی گرام میں شکست کے بعد انہیں بھوانی پور سے ضمنی انتخابات کے لئے امیدوار بنایا گیا تھا۔ ریاستی وزیر شوبھن دیب ناتھ چٹرجی کو پارٹی کی سربراہ ممتابنرجی کے لئے بھوانی پور سے رکن اسمبلی کے عہدے سے مستعفی ہونا پڑا تھا۔
ذرائع کے مطابق کھردہ اسمبلی حلقے میں ترنمول کانگریس کا دبدبہ ہے اور ضمنی انتخابات سے قبل ریاستی وزیر کی جیت یقینی مانی جا رہی ہے۔
مغربی بنگال میں گزشتہ 30 ستمبر کو ہوئے ضمنی انتخابات میں کولکاتا کے بھوانی پور سے ترنمول کانگریس کی سربراہ ممتا بنرجی کامیاب ہوئیں۔ اس کے علاوہ مرشدآباد کے دو اسمبلی حلقوں شمشیرگنج سے امرالاسلام اور جنگی پور سے ذاکر حسین نے جیت درج کی تھی۔
