بہار: انتظامیہ اور پولیس پر حملہ

ریاست بہار کے ضلع روہتاس میں سبزی فروشوں نے انتظامیہ اور پولیس ٹیم پر حملہ کردیا جو ضلع کی سبزی منڈی کو دوسری جگہ منتقل کرنے گئے تھے۔ اس واقعے میں متعدد پولیس اہلکار زخمی ہوگئے ہیں۔ ذرائع کے مطابق پولیس نے لوگوں کو منتشر کرنے کے لئے ہوائی فائرنگ بھی کی۔ سارا معاملہ ضلع کے کرہگر علاقے کا ہے۔

پولیس ٹیم پر حملے کے بارے میں خبر میں بتایا گیا ہے کہ پولیس ٹیم کرہگر سبزی منڈی کو اسٹیڈیم منتقل کرنے کے لئے پہنچی۔ پولیس اہلکاروں نے سبزی فروشوں سے کہا کہ وہ منڈی کو اسٹیڈیم منتقل کریں۔ سبزی بیچنے والے مشتعل ہوگئے اور انہوں نے انتظامیہ کے ساتھ ساتھ پولیس ٹیم پر بھی حملہ کردیا۔ انہوں نے پولیس ٹیم پر پتھراؤ کیا۔ اس واقعے میں دو پولیس اہلکار زخمی ہوگئے۔

ہجوم کو مشتعل ہوتے دیکھ کر پولیس نے فائرنگ کردی۔ جس کے بعد مشتعل مظاہرین فرار ہوگئے۔ حالانکہ پولیس نے فائرنگ کے واقعہ کی تردید کی ہے۔ واقعے کے بعد سبزی منڈی کے آس پاس متعدد پولیس اسٹیشنوں کی پولیس گشت کر رہی ہے۔ اسی دوران ایک شرپسند کو حراست میں بھی لیا گیا ہے۔