Rahul on Modi Lok Sabha Speech پی ایم مودی نے میرے ایک بھی سوال کا جواب نہیں دیا، راہل گاندھی

صنعت کار گوتم اڈانی اور ہنڈن برگ تنازعہ کو قومی سلامتی کا مسئلہ قرار دیتے ہوئے کانگریس رکن پارلیمان راہل گاندھی نے پی ایم مودی پر اڈانی کا دفاع کرنے کا الزام لگایا اور کہا کہ اگر ایسا نہیں ہے تو پھر وزیراعظم کو اس معاملے کی تحقیقات کا حکم دینا چاہیے۔

نئی دہلی:وزیر اعظم نریندر مودی نے بدھ کو لوک سبھا میں کانگریس کو تنقید کا نشانہ بنانے کے فورا بعد، کانگریس کے سنیئر رہنما راہل گاندھی نے پارلیمنٹ کے باہر میڈیا سے بات کرتے ہوئے کہا، یہ واضح ہوگیا کہ پی ایم مودی ان کا (اڈانی) دفاع کر رہے ہیں، یہ قومی سلامتی کا مسئلہ ہے، پی ایم کو انکوائری کا حکم دینا چاہیے۔ میں وزیراعظم کی تقریر سے مطمئن نہیں ہوں۔انھوں نے انکوائری کے بارے میں کوئی بات نہیں کی۔اگر وہ (گوتم اڈانی) دوست نہیں ہیں تو انہیں (پی ایم) کہنا چاہئے تھا کہ انکوائری ہونی چاہئے۔

راہل نے مزید کہا، "میں نے چند سادہ سوالات پوچھے تھے لیکن انھوں نے اس کا جواب نہیں دیا، اس سے سچائی ظاہر ہوتی ہے۔ راہل کا یہ ردعمل اس وقت آیا جب پی ایم مودی نے لوک سبھا میں صدر کے خطاب پر لوک سبھا میں بحث کا جواب دیتے ہوئے اپوزیشن پر سخت تنقید کی۔ وزیر اعظم نے کہا کہ کروڑوں لوگوں کا ان پر اعتماد ان کی حفاظتی ڈھال ہے جسے ان کے ناقدین کی طرف سے بدسلوکی اور الزامات سے توڑا نہیں جا سکتا۔ انھوں نے مزید کہا کہ صدی میں ایک بار ہونے والی وبائی بیماری اور تنازعات کی وجہ سے دنیا کے کچھ حصوں میں عدم استحکام کے درمیان دنیا امید کے ساتھ ہندوستان کی طرف دیکھ رہی ہے، لیکن کچھ لوگ جو مایوسی میں ڈوبے ہوئے ہیں ہندوستان کی ترقی کی کہانی کو قبول کرنے سے انکار کرتے ہیں۔ وہ 140 کروڑ ہندوستانیوں کی کامیابیوں کو نہیں دیکھ سکتے ہیں۔

دلچسپ بات یہ ہے کہ جب وزیر اعظم نے عوامی فلاحی اقدامات کی فہرست پیش کر رہے تھے تو بی جے پی کے اراکین پارلیمنٹ 'مودی، مودی' کے نعرے لگا رہے تھے جبکہ اس موقع پر اپوزیشن ارکان کی جانب سے 'اڈانی، اڈانی' کے نعرے لگائے گئے۔ منگل کو راہل گاندھی نے لوک سبھا میں بحث کے دوران اڈانی-ہنڈن برگ کا مسئلہ اٹھاتے ہوئے مرکزی حکومت کو نشانہ بنایا تھا اور مودی حکومت سے چند سوال کیے تھے۔