ممبئی میں سینچر اور اتوار کی رات موسلادھار بارش کے سبب چیمبور اور وکھرولی علاقے میں دیوار گرنے و لینڈ سلائیڈنگ کے سبب جانی نقصان پر وزیراعظم نریندر مودی اور صدر جمہوریہ رام ناتھ کووند نے غم کا اظہار کیا ہے۔
تفصیلات کے مطابق دیوار گرنے کا واقعہ رات تقریباً ایک بجے پیش آیا جس میں کئی افراد دب گئے تھے۔ زخمیوں کو قریب کے راجاواڑی ہسپتال میں داخل کرایا گیا ہے۔
اس دوران وزیراعظم نریندر مودی نے دیوار گرنے اور لینڈ سلائیڈنگ حادثے میں ہلاک ہونے والوں کے تئیں غم کا اظہار کرتے ہوئے مرنے والوں کے اہلخانہ اور زخمیوں کو مالی دینے کا اعلان کیا ہے۔
وزیراعظم نے اپنے ٹویٹ میں لکھا کہ 'ممبئی کے چیمبور اور وکھرولی میں دیوار گرنے سے لوگوں کی ہلاکت سے غمگین ہوں۔ غم کی اس گھڑی میں ہلاک والوں کے لواحقین اور زخمیوں کے اہلخانہ کے غم میں برابر کا شریک ہوں۔ زخمیوں کی جلد صحتیابی کی دعا کرتا ہوں۔
وزیراعظم نے مزید لکھا کہ 'پرائم منسٹر نیشنل ریلیف فنڈ سے ہلاک ہونے والوں کے اہلخانہ کو 2 لاکھ روپے اور زخمیوں کو 50 ہزار روپے دیئے جائیں گے۔
اس کے علاوہ صدر جمہوریہ رام ناتھ کووند نے بھی شدید بارش کی وجہ سے ممبئی میں ہونے والے جانی نقصان پر اظہار تعزیت کیا۔
صدر جمہوریہ نے لکھا کہ 'میں سوگوار خاندانوں سے اظہار تعزیت کرتا ہوں اور امدادی و راحت رسانی کام میں کامیابی کے لیے دعاگو ہوں۔
