وزیراعظم مودی کی روسی صدر سے گفتگو

دونوں رہنماؤں نے افغانستان کی صورتحال پر تفصیلی بات چیت کی اور دوطرفہ ایجنڈے کے امور بشمول کووڈ 19 کے خلاف بھارت روس تعاون پر بھی تبادلہ خیال کیا۔

وزیر اعظم نریندر مودی نے روسی صدر ولادیمیر پوتن سے فون پر تقریباً 45 منٹ تک بات کی۔ اس دوران دونوں رہنماؤں نے افغانستان کی صورتحال پر تفصیلی گفتگو کی۔ وزیر اعظم نے ٹویٹ کرتے ہوئے لکھا کہ ''میرے دوست صدر پوتن کے ساتھ افغانستان میں حالیہ پیش رفت پر تفصیلی اور مفید تبادلہ خیال کیا۔ ہم نے دو طرفہ ایجنڈے کے امور بشمول کووڈ 19 کے خلاف بھارت روس تعاون پر بھی تبادلہ خیال کیا۔ ہم نے اہم معاملات پر قریبی مشاورت جاری رکھنے پر اتفاق کیا۔''

وزیراعظم مودی کا ٹویٹ

روسی حکومت نے جانکاری دیتے ہوئے بتایا کہ ''بھارتی وزیر اعظم نریندر مودی اور صدر پوتن نے ٹیلی فونک گفتگو کے دوران افغانستان کی صورت حال پر تبادلہ خیال کیا۔ انہوں نے اس ملک میں امن اور استحکام کے قیام کے لیے مربوط کوششوں کی اہمیت پر زور دیا، تاکہ پورے خطے میں سلامتی کو یقینی بنایا جاسکے۔''

روسی حکومت نے کہا کہ ''وزیر اعظم مودی اور صدر پوتن نے افغانستان کی سرزمین سے دہشت گرد نظریات اور منشیات کے خطرے کے پھیلاؤ کے خلاف تعاون بڑھانے کا ارادہ ظاہر کیا ہے۔ اس مسئلے پر مشاورت کے لیے ایک مستقل دو طرفہ چینل بنانے پر اتفاق کیا گیا۔''

واضح رہے کہ طالبان نے 15 اگست کو کابل پر قبضہ کرلیا تھا جس کے بعد سے ملک میں کشمکش کی فضا بنی ہے اور خصوصاً اقلیتیں اپنے مستقبل کے حوالے سے متذبذب صورتحال کا شکار ہیں۔

اس دوران طالبان نے خواتین کے حوالے سے اپنے موقف میں نرمی کا عندیہ دیا تھا۔ طالبان نے اشارہ کیا کہ خواتین کو مکمل ڈھانپنے والا برقع پہننے پر مجبور نہیں کیا جائے گا۔ انہیں صرف حجاب پہننا ہے۔ طالبان کے اعلیٰ رہنماؤں نے اشارہ دیا ہے کہ لڑکیوں کی تعلیم یا ملازمت میں کوئی رکاوٹ نہیں ہونی چاہیے۔ اگرچہ طالبان نے اس بار نرم موقف اپنانے کا عندیہ دیا ہے لیکن لوگ یقین نہیں کررہے ہیں۔

اس کے علاوہ طالبان نے عام معافی کا بھی اعلان کیا ہے اور منشیات کی اسمگلنگ پر پابندی لگانے کی بھی یقین دہانی کرائی ہے۔