وایناڈ: ریاست کیرالہ کے ضلع وایناڈ میں کانگریس رہنما راہل گاندھی نے بی جے پی، سنگھ اور پی ایم مودی پر تنقید کی۔ راہل گاندھی نے کہا کہ بی جے پی، آر ایس ایس اور پی ایم مودی خود کو پورا بھارت سمجھتے ہیں۔ وزیر اعظم محض بھارت کے ایک شہری ہیں، پورے بھارت کے نہیں۔ بی جے پی اور آر ایس ایس بھول گئے ہیں کہ ملک میں 140 کروڑ لوگ ہیں اور وہ بی جے پی یا آر ایس ایس نہیں ہیں۔ بی جے پی، آر ایس ایس یا پی ایم مودی پر تنقید کرنا بھارت پر حملہ نہیں ہے۔
کانگریس رہنما راہل گاندھی نے پیر کے روز کہا کہ ان پر بار بار سیاسی حملے، پولیس کو ان کے گھر بھیجے جانے یا ان کے خلاف کئی مقدمات درج ہونے سے انہیں ڈرایا نہیں جا سکتا کیونکہ وہ سچائی پر یقین رکھتے ہیں اور ہمیشہ اس کے ساتھ کھڑے رہے ہیں۔
واضح رہے کہ اتوار کو دہلی پولیس کی ایک ٹیم کانگریس کی 'بھارت جوڑو یاترا' کے دوران راہل گاندھی کے بیان 'خواتین کا اب بھی جنسی استحصال ہو رہا ہے' کے بارے میں پوچھ گچھ کرنے کے لئے ان کی رہائش گاہ پر پہنچی تھی۔ اگلے دن کانگریس کے سابق چیئرمین کی طرف سے یہ تبصرہ سامنے آیا ہے۔ ویناڈ کے ایم پی راہل گاندھی نے ضلع میں کئی خاندانوں کو فراہم کردہ نئے مکانات کی چابیاں سونپنے کے بعد لوگوں سے خطاب کیا۔
مزید پڑھیں:۔Delhi Police Notice to Rahul Gandhi دہلی پولیس کا راہل گاندھی کو نوٹس، کانگریس جواب دینے کو تیار
کانگریس رہنما نے دعویٰ کیا کہ بہت سے لوگ وزیر اعظم مودی، بی جے پی، راشٹریہ سویم سیوک سنگھ اور پولیس سے ڈر سکتے ہیں، لیکن میں ڈرنے والا نہیں ہوں۔ میں ان سے بالکل نہیں ڈرتا اور یہی ان کا مسئلہ ہے۔ اس کا مسئلہ یہ ہے کہ میں ڈرتا کیوں نہیں۔ وجہ یہ ہے کہ میں سچائی پر یقین رکھتا ہوں۔ ان کا کہنا تھا کہ 'اس سے کوئی فرق نہیں پڑتا کہ مجھ پر کتنے حملے کیے جائیں، کتنی بار پولیس میرے گھر بھیجی جائے یا میرے خلاف کتنے مقدمات درج ہوں، میں ہمیشہ سچ کے لیے کھڑا ہوں۔ میں ایسا ہی ہوں۔
