بھوپال: وزیر اعظم نریندر مودی نے کسی کا نام لیے بغیر آج کچھ ریاستوں کی حکومتوں کو نشانہ بناتے ہوئے کہا کہ مدھیہ پردیش نے بغیر شور مچائے اور اشتہارات پر ایک پیسہ خرچ کیے بغیر تعلیم کے شعبہ میں بہت اونچی چھلانگ لگائی ہے ایسی کامیابی کے لیے تعلیم کے لیے لگن کی سب سے زیادہ ضرورت ہے۔ مودی نے یہاں نئے بھرتی کئے گئے اساتذہ کے تربیتی پروگرام سے ورچوئل طور پر خطاب کیا۔
اس موقع پر انہوں نے کہا کہ یہ مدھیہ پردیش کی مسلسل کوششوں کا نتیجہ ہے کہ ریاست نے ’نیشنل اچیومنٹ سروے‘میں تعلیم کے معیار کے شعبے میں سترہویں مقام سے پانچویں نمبر پر جگہ بنائی گئی ہے۔ ریاست نے یہ بڑی کامیابی بغیر شور مچائے اور اشتہارات پر پیسہ خرچ کیے بغیر حاصل کی ہے۔ خاموشی سے ایسے کام کرنے کے لیے تعلیم کے تئیں لگن کی ضرورت ہوتی ہے۔ اس تربیتی پروگرام سے وزیر اعلیٰ شیوراج سنگھ چوہان اور اسکولی تعلیم کے وزیر مملکت اندر سنگھ پرمار نے بھی خطاب کیا۔