مرکزی مملکتی وزیر برائے امور داخلہ کشن ریڈی نے کہا کہ ریاست تلنگانہ کے عوام وزیراعلی کے چندر شیکھر راو کے خاندانی قوانین کے خلاف لڑنا چاہتے ہیں۔
مذکورہ وزیر نے ایٹالہ راجندر کی بی جے پی میں شمولیت پر نئی دہلی میں کہا کہ یہ صرف شروعات ہے ابھی کئی رہنما بی جے پی میں شامل ہونے جارہے ہیں۔ ایٹالہ راجندر تلنگانہ کے 31 اضلاع کا دورہ کریں گے جہاں لوگ بی جے پی جوائن کریں گے۔
واضح رہے کہ تلنگانہ کے سابق وزیر صحت ایٹالہ راجندر نے ٹی آر ایس پارٹی اور اسمبلی کی رکنیت سے استعفی دے دیا ہے اور وہ پیر کو بی جے پی میں شامل ہوگئے ہیں۔
راجندر نے دارلحکومت نئی دہلی میں مرکزی وزیر دھرمیندر پردھان جی کشن ریڈی کی موجودگی میں بی جے پی میں شمولیت اختیار کی۔
راجندر نے جون 4 کو ٹی آر ایس پارٹی سے اختلافات کی وجہ سے استعفی دے دیا۔ انھیں اراضی قبضہ معاملے میں ملوث ہونے کے الزام میں وزارت سے ہٹادیا گیا تھا۔
