عمران خان نے اشرف صحرائی کے انتقال پر رنج و غم کا اظہار کیا

جموں و کشمیر کے سرکردہ علیحدگی پسند رہنما محمد اشرف صحرائی کی گذشتہ روز دوران حراست موت واقع ہوگئی ہے۔

پاکستان کے وزیراعظم عمران خان نے سینیئر حریت رہنما محمد اشرف صحرائی کے انتقال پر دکھ کا اظہار کیا ہے۔ انہوں نے دوران حراست اشرف صحرائی کے انتقال پر بھارتی حکومت اور عالمی برادری پر برہمی کا اظہار کیا۔

انہوں نے ٹویٹ میں لکھا کہ 'غیرقانونی تحویل میں کشمیری رہنما اشرف صحرائی کے انتقال پر گہرا رنج و غم ہوا۔ کشمیریوں پر بھارت کی زیادتی عالمی برادری کے کردار پر ایک دھبہ ہے۔ ہم یو این ایس سی کی قراردادوں کے مطابق حق خود ارادیت کے لیے کشمیریوں کی جدوجہد کی حمایت جاری رکھیں گے۔'

عمران خان

واضح رہے جموں و کشمیر کے سرکردہ علیحدگی پسند رہنما محمد اشرف صحرائی کی گذشتہ روز دوران حراست موت واقع ہوگئی ہے۔ صحرائی کو گذشتہ روز کوٹ بلوال جیل سے جموں کے مہاراجہ گلاب سنگھ ہسپتال میں منتقل کیا گیا تھا جس کے بعد سرینگر میں ان کے افراد خانہ کو اس کی اطلاع دی گئی تھی۔ کشمیر بار ایسوسی ایشن نے ان کی موت کو 'حراستی قتل' سے تعبیر کیا ہے۔

آج صبح انہیں ان کے آبائی قبرستان واقع ٹیکی پورہ لولاب میں سپرد خاک کیا گیا۔