بارہ بنکی : ریڑھی دکانداروں کے فروغ کے لئے دیپوتسو میلے کا اہتمام

ریاست اتر پردیش کے بارہ بنکی میں ریڑھی پٹری دکانداروں کے فروغ کے لئے 6 روزہ دیپوتسو میلے کا انعقاد کیا گیا ہے۔ دیپوتسو میلے میں پی ایم سواندھی اسکیم کے مستفدین کو ایک پلیٹ فارم مہیہ کرایا گیا ہے تاکہ ان کا فروغ ہو اور ان کی بھی دیوالی بہتر طریقے سے ہو سکے۔

بارہ بنکی کے جی آئی سی میدان میں ہو رہے اس میلے کا جمعرات کی دوپہر رکن پارلیمان اوپیندر راوت نے باقاعدہ افتتاح کیا۔ افتتاحیہ تقریب میں پی ایم سواندھی اسکیم کے مستفدین کا اعزاز کیا گیا۔ انہیں سند تقسیم کی گئیں اور ساتھ ہی انہیں دھوپ سے بچانے کے لئے چھتری بھی تقسیم کی گئی۔

اس کے علاوہ اور بھی کئی اسکیمات کے مستفدین کو سند تقسیم کئے گئے۔ دیپوتسو میلے میں سیلف ہیلپ گروپس کی خواتین نے بھی اپنے پروڈکٹس کی نمائش لگائی ہے۔ افتتاح کے بعد رکن پارلیمان اوپیندر راوت نے میلے کا معائینہ کیا۔

اس موقع پر انہوں نے کہا کہ بی جے پی کی حکومت بننے کے بعد سے تمام کام پہلی دفعہ ہوئے ہیں۔ پہلی دفعہ ان ریڑھی پٹری دکانداروں کے لئے بھی سوچا گیا ہے۔ اس میلے سے ریڑھی پٹری دکانداروں کو مدد ملے گی اور کووڈ-19 کے دور میں جو ان کا نقصان ہوا ہے، اس میں بھی انہیں فائدہ ملے گا۔