INDIA MPs Manipur Visit اپوزیشن اتحاد انڈیا کا وفد منی پور کے دو روزہ دورے کے بعد واپس دہلی پہنچا

اپوزیشن اتحاد 'انڈیا' کے اکیس اراکین پارلیمنٹ کا وفد تشدد زدہ منی پور کا دو روزہ دورہ کرنے کے بعد واپس دہلی پہنچ گیا ہے۔ پیر کو پارلیمنٹ میں اپوزیشن لیڈر ملکارجن کھڑگے کے چیمبر میں ملاقات کر کے شمال مشرقی ریاست کی صورتحال سے آگاہ کریں گے۔ وفد کا کہنا کہے کہ منی پور میں صورتحال بہت سنگین ہے اس کے باوجود حکومت سخت قدم نہیں اٹھا رہی ہے۔

نئی دہلی: اپوزیشن کے انڈین نیشنل ڈیولپمنٹل انکلوسیو الائنس (I.N.D.I.A) کے ممبران پارلیمنٹ کا 21 رکنی وفد تشدد زدہ منی پور کی صورتحال کا جائزہ لینے کے بعد قومی دارالحکومت واپس پہنچ گیا ہے۔ وفد پیر کو پارلیمنٹ میں اپوزیشن لیڈر ملکارجن کھرگے کے چیمبر میں ملاقات کر کے شمال مشرقی ریاست کی صورتحال سے آگاہ کریں گے۔ اپنے دو روزہ دورے کے دوران حزب اختلاف کے اراکین پارلیمنٹ نے امپھال، بشنو پور ضلع کے موئرنگ اور چورا چند پور میں کئی ریلیف کیمپوں کا دورہ کیا اور نسلی جھڑپوں کے متاثرین سے ملاقات کی۔

اتوار کو رہنماؤں نے منی پور کی گورنر انوسویا یوکی سے راج بھون میں ملاقات کی اور انہیں ایک میمورنڈم سونپا اور ان سے انصاف کی بنیاد تمام موثر اقدامات کرتے ہوئے امن اور ہم آہنگی کو بحال کرنے کی درخواست کی۔ 'انڈیا' اتحاد نے زور دیا کہ منی پور نسلی تنازعہ، جو گزشتہ تین ماہ سے جاری ہے، اگر اسے جلد حل نہ کیا گیا تو ملک کے لیے سلامتی کے مسائل پیدا کر سکتے ہیں۔

شمال مشرقی ریاست سے واپسی کے بعد یہاں ہوائی اڈے پر نامہ نگاروں سے بات کرتے ہوئے لوک سبھا میں کانگریس کے لیڈر چودھری نے کہا کہ منی پور کے لوگوں کے ذہنوں میں خوف اور غیر یقینی کی کیفیت ہے۔ منی پور میں صورتحال بہت سنگین ہے۔ انہوں نے مزید کہا کہ منی پور میں کافی غیر یقینی صورتحال ہے۔ ہزاروں لوگ اپنے گھروں سے بے گھر ہو چکے ہیں۔ وہ نہیں جانتے کہ وہ کب اپنے گھروں کو لوٹیں گے۔ کاشتکاری ٹھپ ہو کر رہ گئی ہے۔ انہوں نے یہ بھی کہا کہ مجھے نہیں معلوم کہ کوکی اور میتھئی کے درمیان کی تقسیم کو کیسے ختم کیا جائے گا۔ مرکزی حکومت ہو یا ریاستی حکومت، حکومت کی طرف سے کوئی مضبوط قدم نہیں اٹھایا گیا ہے۔

اپوزیشن رہنماؤں نے اتوار کو قومی راجدھانی واپس لوٹے اور اس عزم کا اظہار کیا کہ اس معاملے کو پیر سے پارلیمنٹ میں آگے بڑھایا جائے گا۔ زیادہ تر ممبران پارلیمنٹ جو وفد کا حصہ تھے ان کا کہنا تھا کہ امدادی کیمپوں کی قابل رحم حالت ہے۔