پونچھ کے جنگلاتی علاقے میں سرچ آپریشن کے دوران دو طرفہ فائرنگ میں فوج کا ایک جوان ہلاک ہو گیا، جبکہ دو دیگر زخمی ہوئے ہیں۔
ضلع پونچھ کی تحصیل مینڈھر کے جنگلاتی علاقے میں فوج اور پولیس کی مشترکہ کارروائی کے دوران عسکریت پسندوں نے سکیورٹی فورسز پر فائرنگ کردی، جس میں فوج کے جے سی او ہلاک ہوگئے، جبکہ دو جوان شدید زخمی ہوئے ہیں۔
فائرنگ کے بعد سے علاقے میں خوف کا ماحول ہے۔ فوج نے علاقے کو محاصرہ میں لے کر بڑی تعداد میں سکیورٹی فورسز کو تعینات کر دیا ہے۔
جمعرات کو کچھ مخصوص خفیہ جانکاری پر جنگلاتی علاقے میں فوج اور پولیس نے مشترکہ طور پر سرچ آپریشن چلایا۔ شام کے وقت عسکریت پسندوں نے ایک بار پھر فوج پر گھات لگا کر حملہ کیا جس میں ایک فوجی ہلاک جبکہ دو دیگر شدید زخمی ہوئے۔
ان عسکریت پسندوں کو پکڑنے کے لیے بڑی تعداد میں سیکورٹی فورسز کو تعینات کیا گیا ہے، ان حالات کے پیش نظر راجوری پونچھ قومی شاہراہ پر ٹریفک کو روک دیا گیا ہے۔