باون کھیڑی قتل کیس: شبنم کی پھانسی کی سزا مؤخر

امروہہ کے باون کھیڑی قتل کیس کی قصوروار شبنم کی دوسری رحم کی درخواست گورنر تک پہنچ گئی ہے جس کی تصدیق امروہہ کے سرکای وکیل مہاویر سنگھ نے کی ہے۔ اب یہ واضح ہوگیا ہے کہ رحم کی درخواست پر فیصلہ آنے تک ان کی پھانسی مؤخر رہے گی۔

شبنم کا ڈیتھ وارنٹ جاری ہونے کے معاملے میں جب ہم نے امروہہ ضلع عدالت میں سرکاری وکیل مہاویر سنگھ سے بات کی تو انہوں نے بتایا کہ 'رامپور جیل انتظامیہ سے پتہ چلا ہے کہ شبنم نے رامپور جیل سے گورنر کے ذریعہ صدر جمہوریہ کو دوبارہ رحم کی عرضی بھیجی ہے جس پر وکیل کا کہنا ہے کہ اب گورنر کے ذریعہ عرضی صدر جمہوریہ کو بھیجی جائے گی، اس کے بعد ہی کوئی حتمی فیصلہ لیا جائے گا'۔

شبنم کی جانب سے دی گئی رحم کی دوسری درخواست کی وجہ سے اس کی پھانسی مؤخر رہے گی۔ مزید یہ کہ دوسری رحم کی درخواست پر کیا فیصلہ لیا جاتا ہے یہ بھی دیکھنا دلچسپ ہوگا۔ آیا صدر جمہوریہ شبنم کی درخواست قبول کرتے ہیں یا پھر سزا برقرار رکھتے ہیں۔