وزیر کا بیٹا لوگوں کو کچلے تو آئین خطرے میں ہے: راہل

راہل گاندھی نے کہا کہ حکومت مسلسل غلط اقدامات اٹھا رہی ہے اور ہر قدم کے ساتھ ملک کا آئین خطرے میں پڑ رہا ہے۔

کانگریس کے سابق صدر راہل گاندھی نے لکھیم پور واقعہ پر کہا ہے کہ اگر کسی خاتون کو ایف آئی آر کے بغیر حراست میں رکھا جاتا ہے اور ایک وزیر کا بیٹا ستیہ گرہیوں کو اپنی گاڑی سے کچلتا ہے تو یقینی طور پر ملک کا آئین خطرے میں ہے۔

منگل کو یہاں جاری ایک بیان میں راہل گاندھی نے کہا کہ حکومت مسلسل غلط اقدامات اٹھا رہی ہے اور ہر قدم کے ساتھ ملک کا آئین خطرے میں پڑ رہا ہے۔

انہوں نے کہا کہ اگر کسی وزیر کا بیٹا ستیہ گرہیوں کسانوں کو اپنی گاڑی کے نیچے کچلتا ہے تو ملک کا آئین خطرے میں ہے۔ اگر ویڈیو منظر عام پر آنے کے بعد بھی اسے حراست میں نہیں لیا گیا تو ملک کا آئین خطرے میں ہے۔

انہوں نے کانگریس کی جنرل سکریٹری پرینکا گاندھی کی نظربندی کو آئین کے لیے خطرہ قرار دیتے ہوئےکہا کہ ’’اگر کسی خاتون رہنما کو 30 گھنٹے تک ایف آر آئی کے بغیر حراست میں لیا جائے تو ملک کا آئین خطرے میں ہے۔ اگر کسی کو بھی متاثرین کے اہل خانہ سے ملنے کی اجازت نہیں ہے تو ملک کا آئین خطرے میں ہے۔ اگر یہ ویڈیو کسی کو تکلیف نہیں پہنچاتی تو انسانیت بھی خطرے میں ہے۔

راہل گاندھی کا ٹویٹ

اس کے علاوہ راہل گاندھی نے ٹویٹ کر کہا کہ 'جسے حراست میں رکھا ہے، وہ ڈرتی نہیں ہے، سچی کانگریسی ہے، ہار نہیں قبول کرے گی، ستیہ گرہ رکے گا نہیں'۔

ایک دوسرے ٹویٹ میں راہل گاندھی نے لکھا کہ ''پرینکا میں جانتا ہوں تم پہچھے نہیں ہٹوگی۔تمہاری ہمت سے وہ ڈر گئے ہیں، انصاف کی اس عدم تشدد لڑائی میں ہم کسانوں کو فتح دلا کر رہیں گے۔''