Black Fungus: بیماری پھیل چکی ہے، دوا دستیاب نہیں: ڈاکٹر نریش کمار

سینئر کانگریسی لیڈر اور سابق ایم ایل اے ڈاکٹر نریش کمار نے کہا کہ کورونا وائرس کی عالمی وباء کے بعد ملک بھر میں سیاہ فنگس (Black Fungus) کی نئی بیماری اب لوگوں کے لئے مہلک ثابت ہورہی ہے اور یہ انتہائی افسوس کی بات ہے کہ ملک میں دوا نہیں ہے۔

ڈاکٹر نریش کمار نے جمعرات کے روز مرکزی وزیر صحت ڈاکٹر ہرش وردھن کو لکھے گئے خط میں مطالبہ کیا ہے کہ دہلی کے علاوہ کالی فنگس کی بیماری پورے ملک میں پھیل چکی ہے اور ملک میں اس کے علاج کے لئے کافی مقدار میں دوا دستیاب نہیں ہے، جس کے پیش نظر بیرون ملک سے فوری طور پر دوائیں درآمد کرکے دہلی اور دیگر ریاستوں میں تقسیم کی جائے۔

انہوں نے کہا کہ دہلی میں ٹیکے کی بھی بہت قلت ہے۔ دہلی کو کافی تعداد میں ٹیکے کی خوراک (ویکسین) دی جانی چاہئے۔ اس موقع پر انہوں نے دہلی کے وزیر صحت ستیندر جین کے اس بیان کی بھی مذمت کی ہے، جس میں انہوں نے ایک ٹویٹ کے ذریعہ کانگریس پر لوگوں کی لاشوں پر سیاست کرنے کا الزام لگایا ہے۔ مسٹر نریش کمار نے کہا کہ سچائی یہ ہے کہ مرکزی حکومت کورونا وائرس اور اب کالی فنگس کی وبا کو روکنے میں ناکام رہی ہے۔

کانگریسی لیڈر نے کہا کہ 15 مئی کو ایمس کے ڈائریکٹر رندیپ گلیریا نے بھی اس بیماری کی حساسیت کے بارے میں اپنے خیالات کا اظہار کیا تھا۔ انہوں نے کہا کہ وزیر اعظم اور وزیر داخلہ دونوں اتر پردیش میں انتخابات پر تبادلہ خیال کر رہے ہیں لیکن اس سیاب فنگس کی بیماری پر غور کرنے یا اس سے نمٹنے کی کوئی حکمت عملی نہیں بنائی گئی ہے جو ایک وباء کی شکل اختیار کرتی جارہی ہے۔