کرناٹک اور مہاراشٹر میں رات کا کرفیو نافذ

ریاست کرناٹک کے وزیر اعلی بی ایس یدیورپا اور مہاراشٹر کے وزیر اعلی ادھو ٹھاکرے نے کورونا وائرس کے پھیلاؤ کو روکنے کے لیے رات کا کرفیو نافذ کیا ہے۔

کورونا وائرس کے نئے اسٹرین کے آنے کے بعد کرناٹک نے 23 دسمبر 2020 کی رات سے دو جنوری 2021 تک رات کا کرفیو نافذ کرنے کا اعلان کیا ہے۔ حکومت کا کہنا ہے کہ یہ کرفیو کرونا وائرس کی سیکنڈ ویو کور روکنے کے لیے نافذ کیا گیا ہے۔

وزیر اعلی بی ایس یدیورپا نے ریاستی وزراء سے اجلاس کرنے کے بعد میڈیا سے کہا کہ 'حکومت نے آج سے رات 10 بجے سے صبح چھ بجے تک نو روز کا کرفیو نافذ کرنے کا اعلان کیا ہے'۔

ادھر مہاراشٹر حکومت نے 22 دسمبر 2020 سے پانچ جنوری 2021 تک 15 روز کا رات کا کرفیو نافذ کیا ہے۔ یہ کرفیو رات کے 11 بجے سے صبح چھ بجے تک رہے گا۔

مہاراشٹر کے وزیر اعلی ادھو ٹھاکرے نے ایک اجلاس منعقد کیا اور ممبئی سمیت پورے مہاراشٹر میں رات کا کرفیو نافذ کرنے کا اعلان کیا۔ انہوں نے کرفیو نافذ کرنے کی دو وجوہات بتائی ہیں۔

بی ایم سی کے کمشنر اقبال سنگھ چہل کے مطابق نئے برس کے موقع پر کورونا وائرس کو پھیلنے سے روکنے اور کورونا وائرس کے نئے قسم کو روکنے کے لیے یہ کرفیو نا‌فذ کیا گیا ہے۔