Live Update پارلیمنٹ کی نئی عمارت کا افتتاح، وزیر اعظم نے 75 روپے کا سکہ جاری کیا

13:35 May 28

آتم نربھر بھارت کے عروج کا گواہ بنے گا نیا پارلیمنٹ ہاؤس

وزیر اعظم نریندر مودی نے کہا کہ یہ نئی عمارت ہمارے مجاہدین آزادی کے خوابوں کی تعبیر کا ذریعہ بنے گی۔ یہ نئی عمارت آتم نربھر بھارت کے عروج کا گواہ بنے گی۔

13:30 May 28

آج نیا بھارت نئے اہداف طئے کررہا ہے: وزیر اعظم مودی

نئے پارلیمنٹ ہاؤس میں وزیر اعظم نریندر مودی نے کہا کہ آج 28 مئی 2023 ایک ایسا مبارک موقع دن ہے۔ ملک آزادی کے 75 سال مکمل ہونے کے موقع پر امرت مہوتسو منا رہا ہے۔ میں اس سنہرے لمحے کے لیے تمام ہم وطنوں کو مبارکباد دیتا ہوں۔ یہ صرف ایک عمارت نہیں ہے، یہ 140 کروڑ ہندوستانیوں کی خواہشات کی عکاس ہے۔ یہ ہماری جمہوریت کا مندر ہے۔ انہوں نے کہا کہ ملک آزادی کے 75 سال مکمل ہونے پر امرت مہوتسو منا رہا ہے۔ پارلیمنٹ ہاؤس کے احاطے میں آج صبح ہی دعائے خیر کا اہتمام کیا گیا ہے۔ میں اس سنہری لمحے کے لیے تمام ہم وطنوں کو مبارکباد دیتا ہوں۔ انہوں نے کہا کہ آج نیا بھارت نئے اہداف طے کر رہا ہے۔ نیا جوش ہے، نئی امنگ ہے، نئی سمت ہے، نیا وژن ہے...

13:21 May 28

وزیر اعظم نے 75 روپے کا سکہ جاری کیا

وزیر اعظم نریندر مودی نے نئے پارلیمنٹ ہاؤس سے وزارت خزانہ کی طرف سے تیار کردہ 75 روپے کے خصوصی سکے جاری کیے۔

13:19 May 28

لوک سبھا اسپیکر اوم برلا نے پی ایم مودی کا شکریہ ادا کیا

لوک سبھا کے اسپیکر اوم برلا نے نئے پارلیمنٹ ہاؤس میں کہا کہ پورا ملک آج اس لمحے کا گواہ ہے۔ میں پی ایم مودی کا شکریہ ادا کرتا ہوں جن کی قیادت میں یہ نیا پارلیمنٹ 2.5 سال میں تعمیر ہوا۔ انہوں نے کہا کہ اس امرت کال میں دنیا میں بھارت کا مان بڑھا ہے۔ ہماری پارلیمنٹ چیلنجوں کو مواقع میں تبدیل کرنے کی صلاحیت رکھتی ہے۔ جمہوریت ہمارے مضبوط مستقبل کی بنیاد ہے۔ انیکتا میں ایکتا ہماری طاقت ہے۔

13:19 May 28

صدر دروپدی مرمو کا پیغام پڑھ کر سنایا گیا

راجیہ سبھا کے ڈپٹی چیئرمین ہری ونش نے نئے پارلیمنٹ ہاؤس میں صدر دروپدی مرمو کا پیغام پڑھ کر سنایا۔

13:18 May 28

اس اہم تاریخی اور قابل فخر لمحے پر پوری قوم کو مبارکباد: نائب صدر جگدیپ دھنکھڑ

راجیہ سبھا کے ڈپٹی چیئرمین ہری ونش نارائن سنگھ نے نئے پارلیمنٹ ہاؤس کے افتتاح کے موقع پر نائب صدر جگدیپ دھنکھر کا پیغام پڑھ کر سنایا۔ نائب صدر جگدیپ دھنکھڑ نے اپنے پیغام میں کہا کہ مجھے بھارتی جمہوریت کی بے مثال ترقی کے سفر کے اس اہم تاریخی اور قابل فخر لمحے پر پورے ملک کو مبارکباد دیتے ہوئے بہت خوشی ہو رہی ہے... مجھے یقین ہے کہ اس امرت کال میں بنایا گیا نیا پارلیمنٹ ہاؤس ہماری ترقی کا گواہ بھی رہے گا۔

13:17 May 28

ہری ونش نے نائب صدر جگدیپ دھنکھر کا پیغام پڑھا

راجیہ سبھا کے ڈپٹی چیئرمین ہری ونش نے نئے پارلیمنٹ ہاؤس کے افتتاح کے دوران نائب صدر جگدیپ دھنکھر کا پیغام پڑھا۔

13:11 May 28

ملک کی خواتین اور بیٹیوں کی توہین کے بعد نئے پارلیمنٹ کے افتتاح پر اہل وطن کو مبارکباد: ونیش پھوگٹ

دہلی کے جنتر منتر پر احتجاج کرنے والے ملک کے نامور پہلوان نئے پارلیمنٹ ہاؤس کی طرف مارچ کر رہے ہیں۔ مارچ کے لیے روانہ ہونے سے پہلے پہلوان ساکشی ملک نے اس بات کا اعادہ کیا کہ ان کا مارچ پرامن ہوگا۔ انہوں نے سرحد پر رکے ہوئے حامیوں پر بھی زور دیا کہ وہ امن برقرار رکھیں اور کسی بھی قسم کے تشدد میں ملوث نہ ہوں۔ ریسلر ونیش پھوگاٹ نے کہا کہ ملک کی خواتین اور بیٹیوں کی توہین کے بعد میں وزیر اعظم کے ذریعہ نئے پارلیمنٹ ہاؤس کے افتتاح پر بھارتی عوام کو مبارکباد دیتی ہوں۔ صحافیوں سے بات کرتے ہوئے پہلوان بجرنگ پونیا نے پولیس انتظامیہ پر زور دیا کہ وہ زیر حراست کھاپ لیڈروں کو رہا کرے۔ پارلیمنٹ ہاؤس سے تقریباً دو کلومیٹر دور جنتر منتر پر احتجاج کرنے والے پہلوانوں نے کہا کہ وہ کسی بھی قیمت پر نئی عمارت کے قریب اپنی 'مہیلا مہاپنچایت' منعقد کریں گے۔ تاہم پولیس نے کہا کہ کسی بھی مظاہرین کو نئی عمارت کی طرف جانے کی اجازت نہیں دی جائے گی کیونکہ 'مہیلا مہاپنچایت' کے انعقاد کی اجازت نہیں دی گئی ہے۔

13:05 May 28

راجیہ سبھا کے ڈپٹی چیئرمین ہری ونش نے نئی پارلیمنٹ میں سب کا خیر مقدم کیا

نئی پارلیمنٹ میں راجیہ سبھا کے ڈپٹی چیئرمین ہری ونش نے کہا کہ یہ بڑی خوشی کی بات ہے کہ پی ایم مودی کی قیادت میں 2.5 سال سے بھی کم عرصے میں ایک نئی جدید پارلیمنٹ کی تعمیر ہوئی ہے۔ انہوں نے پروگرام میں موجود اراکین پارلیمنٹ اور مہمانوں کا استقبال کیا۔

13:04 May 28

تقریب کے دوسرے مرحلے کا آغاز قومی ترانے سے ہوا

پی ایم مودی نے نئی لوک سبھا میں تقریب کا آغاز قومی ترانے سے کیا۔ اس موقع پر اراکین پارلیمنٹ، مختلف ریاستوں کے وزرائے اعلیٰ اور دیگر معززین موجود رہے۔

13:03 May 28

وزیر اعظم نریندر مودی نے ساورکر کو خراج عقیدت پیش کیا

وزیر اعظم نریندر مودی نے نئی پارلیمنٹ میں ساورکر جینتی کے موقع پر وی ڈی ساورکر کو خراج عقیدت پیش کیا۔

12:32 May 28

بی جے پی پر دلت مخالف ذہنیت رکھنے کا الزام

عام آدمی پارٹی کے رہنما سنجے سنگھ نے بی جے پی پر دلت مخالف ذہنیت رکھنے کا الزام لگایا۔ سنجے سنگھ نے حکومت کو قبائلیوں اور دلتوں کے مخالف ہونے پر تنقید کا نشانہ بنایا۔ انہوں نے کہا کہ نئے پارلیمنٹ ہاؤس کے افتتاح کے موقع پر ملک کی پہلی قبائلی صدر دروپدی مرمو کو مدعو نہیں کیا ۔ انہوں نے کہا کہ آئین کا آرٹیکل 79 یہ کہتا ہے کہ پارلیمنٹ میں لوک سبھا، راجیہ سبھا اور صدر شامل ہیں لیکن اس کے باوجود صدر کو مدعو نہیں کیا گیا۔

11:42 May 28

اسپیکر اوم برلا نے بتایا جمہوری تاریخ کا اہم لمحہ

لوک سبھا کے اسپیکر اوم برلا نے پی ایم مودی کے ذریعہ نئے پارلیمنٹ ہاؤس کے افتتاح کو ملک کی جمہوری تاریخ کا ایک اہم لمحہ قرار دیا ہے۔ لوک سبھا اسپیکر نے ٹویٹ کیا ہے کہ جمہوریت کا یہ نیا مندر اتحاد، سالمیت، مساوات، انصاف اور بھائی چارے کے جذبے کو تقویت دے کر ملک کو نئی بلندیوں پر لے جانے کے لیے ہم سب کے لیے ایک تحریک بنے گا۔

11:40 May 28

آر جے ڈی کو عوام جواب دے گی

مرکزی وزیر پرہلاد جوشی نے کہا کہ کانگریس ملک میں اچھی چیزوں کو برداشت نہیں کر رہی ہے، وہ سینگول کے بارے میں جھوٹ بول رہی ہے۔ پارلیمنٹ جمہوریت کا مندر ہے، جس طرح سے وہ (آر جے ڈی) نئی پارلیمنٹ کے لیے نازیبا الفاظ استعمال کر رہے ہیں، عوام انہیں منہ توڑ جواب دیں گے۔

11:37 May 28

اگر لوک سبھا اسپیکر نئی عمارت کا افتتاح کرتے تو بہتر ہوتا: اویسی

اے آئی ایم آئی ایم کے سربراہ اسد الدین اویسی نے کہا کہ بہتر ہوتا اگر لوک سبھا اسپیکر اوم برلا نئے پارلیمنٹ ہاؤس کا افتتاح کرتے۔ انہوں نے آر جے ڈی کے ذریعے پارلیمنٹ کا تابوت سے موزانہ کرنے پر کہا کہ آر جے ڈی کا کوئی موقف نہیں، پرانے پارلیمنٹ ہاؤس کو دہلی فائر سروس سے کلیئرنس تک نہیں تھا۔ وہ (آر جے ڈی) پارلیمنٹ کو تابوت کیوں کہہ رہے ہیں؟ وہ کچھ اور بھی کہہ سکتے تھے، انہیں یہ انگل لانے کی کیا ضرورت تھی۔

11:33 May 28

پی ایم مودی نے نئی عمارت کو عظیم الشان قرار دیا

نئے پارلیمنٹ ہاؤس کا افتتاح کرنے کے بعد وزیر اعظم نریندر مودی نے ٹویٹ کیا کہ آج کا دن ہم تمام ہم وطنوں کے لیے ناقابل فراموش دن ہے۔ انہوں نے اپنے ٹویٹ میں مزید کہا کہ پارلیمنٹ کی نئی عمارت ہم سب کو فخر اور امیدوں سے بھر دینے والی ہے۔ مجھے پورا یقین ہے کہ یہ عظیم الشان عمارت عوام کو بااختیار بنانے کے ساتھ ساتھ قوم کی خوشحالی اور طاقت کو نئی رفتار دے گی۔

11:29 May 28

ملک کے لوگ مودی کے ساتھ، اپوزیشن کو یہ پسند نہیں: ایکناتھ شندے

مہاراشٹر کے وزیر اعلی ایکناتھ شندے نے اتوار کو کہا کہ اپوزیشن پارٹیوں کو وزیر اعظم نریندر مودی کا ملک کے لئے کام کرنا پسند نہیں ہے۔ مہاراشٹر کے وزیر اعلیٰ نے نئے پارلیمنٹ ہاؤس کے افتتاح کے بائیکاٹ پر اپوزیشن جماعتوں کی سخت تنقید کی۔ انہوں نے کہا کہ تمام اہل وطن وزیر اعظم مودی کے ساتھ ہیں جنہوں نے جمہوریت کے مندر (نئے پارلیمنٹ ہاؤس) کو قوم کے نام وقف کیا۔ شندے پارلیمنٹ کی نئی عمارت کی افتتاحی تقریب میں شرکت کر رہے ہیں۔

10:02 May 28

پی ایم مودی کے پروگرام کا شیڈول

پی ایم مودی کے پروگرام کا شیڈول

ملک کے نئے پارلیمنٹ ہاؤس کے افتتاح کے موقع پر لوک سبھا اسپیکر اوم برلا، پی ایم مودی اور راجیہ سبھا کے ڈپٹی چیئرمین ہری ونش خطاب کریں گے۔ پی ایم مودی 12 بجے پارلیمنٹ ہاؤس پہنچیں گے، جس کے بعد راجیہ سبھا کے ڈپٹی چیئرمین ہری ونش سب کا استقبال کریں گے۔ اس دوران شارٹ فلم 'نیو کنسٹرکٹڈ ہاؤس آف پارلیمنٹ' کی اسکریننگ کی جائے گی۔ اس کے بعد سینگول پر بنائی گئی مختصر فلم کی اسکریننگ ہوگی۔ صدر اور نائب صدر کا پیغام راجیہ سبھا کے ڈپٹی اسپیکر کے ذریعہ دیا جائے گا۔ لوک سبھا اسپیکر اوم برلا کے پیغام کے بعد وزیر اعظم مودی دوپہر 12:40 بجے 75 روپے کا سکہ اور ڈاک ٹکٹ جاری کریں گے۔ اس دوران پی ایم مودی نئی پارلیمنٹ میں خطاب بھی کریں گے۔ پی ایم مودی تین گروپوں کے ساتھ فوٹو سیشن بھی کریں گے۔ ان میں شرم جیوی (75)، ہاؤسنگ کی وزارت اور سی پی ڈبلیو ڈی کے افسران (60) اور ٹاٹا پروجیکٹس لمیٹڈ (61) شامل ہیں۔

09:07 May 28

گوگل اور ٹوئٹر پر ٹاپ ٹرینڈنگ میں #MyParliamentMyPride

گوگل اور ٹوئٹر پر ٹاپ ٹرینڈنگ میں

پارلیمنٹ کی نئی عمارت کا افتتاح آج صبح وزیر اعظم نریندر مودی نے کیا۔ اس حوالے سے سیاسی جماعتوں کے درمیان آپسی تنازع ہو لیکن ملک کے عوام میں کافی جوش و خروش دیکھا جارہا ہے۔ اس وقت بھارت میں ٹوئٹر پر #MyParliamentMyPride ٹاپ ٹرینڈنگ میں سے ایک ہے۔ ٹوئٹر ٹرینڈنگ کے اعدادوشمار کے مطابق خبر لکھے جانے تک 2 لاکھ 51 ہزار افراد #MyParliamentMyPride کے ساتھ اپنے جذبات کا اظہار کر چکے ہیں۔ ساتھ ہی، وزیر اعظم نریندر مودی اور نئے پارلیمنٹ ہاؤس کا افتتاح بھی گوگل سرچ میں ٹاپ ٹرینڈنگ میں ہے۔

09:06 May 28

New Parliament House وزیر اعظم نے پارلیمنٹ کی نئی عمارت کا افتتاح کیا

وزیر اعظم نریندر مودی نے اتوار کو پارلیمنٹ کی نئی عمارت کا افتتاح کیا۔ وزیر اعظم نریندر مودی کے ساتھ لوک سبھا اسپیکر اوم برلا بھی موجود تھے۔ نئے پارلیمنٹ ہاؤس کی افتتاحی تقریب میں کئی معروف شخصیات شرکت کر رہی ہیں۔ پی ایم مودی نے نئے پارلیمنٹ ہاؤس کی تعمیر کرنے والے مزدوروں کو اعزاز سے نوازا۔ افتتاحی تقریب میں 25 جماعتوں کے نمائندے، کئی ریاستوں کے وزرائے اعلیٰ، مرکزی وزراء اور معروف شخصیات شرکت کر رہی ہیں۔

08:59 May 28

پی ایم مودی نے تاریخی 'سینگول' نصب کیا

وزیر اعظم نریندر مودی نے نئے پارلیمنٹ ہاؤس میں لوک سبھا اسپیکر کی کرسی کے قریب تاریخی 'سینگول' نصب کیا۔

08:59 May 28

وزیر اعظم عمارت کی تعمیر اور ترقی میں مدد کرنے والوں کو اعزاز سے نوازا

وزیر اعظم نریندر مودی نے پارلیمنٹ کی نئی عمارت کی تعمیر اور ترقی میں مدد کرنے والوں کو اعزاز سے نوازا ۔

08:57 May 28

وزیر اعظم نریندر مودی اور لوک سبھا اسپیکر اوم برلا نے پوجا شروع کی۔

پی ایم مودی اور لوک سبھا اسپیکر اوم برلا نے نئے پارلیمنٹ ہاؤس کے افتتاح کے لیے پوجا شروع کی۔ یہ پروگرام تقریباً ایک گھنٹے تک جاری رہے گا۔ پوجا کے بعد پارلیمنٹ کی نئی عمارت میں وزیر اعظم 'سینگول' نصب کریں گے۔

08:55 May 28

ملک کی نئی پارلیمنٹ کا وزیر اعظم مودی نے افتتاح کیا

وزیر اعظم نریندر مودی آج پارلیمنٹ کی نئی عمارت کا افتتاح کریں گے۔ افتتاحی تقریب صبح 7:15 بجے شروع ہوگی۔ افتتاح ویدک رسومات کے ساتھ کیا جائے گا۔ یہ افتتاحی تقریب دو مرحلوں میں ہوگی۔ پہلے مرحلے میں صبح 7:15 سے 9:30 بجے تک پوجا کی تقریب ہوگی، جبکہ 11:30 بجے سے افتتاحی تقریب ہوگی۔