ریاست جھارکھنڈ کے ضلع گرڈیہ میں بند کے اعلان سے چند گھنٹے قبل نکسلیوں نے ہنگامہ برپا کر دیا۔ نکسلیوں نے گیا۔دھنباد کے راستے نئی دہلی سے ہاوڑہ جانے والے ریلوے لائن کو نشانہ بنایا ہے۔ اس ریلوے لائن میں جھارکھنڈ کے گریڈیہ ضلع کے سریا تھانہ علاقے کے چیچاکی اور چودھری ڈیم کے درمیان اپ اور ڈاون ٹریک پر دھماکہ ہوا ہے۔Naxal Attack On Railway Track Giridih
دھماکے سے ٹریک کو نقصان پہنچا ہے، ساتھ ہی اس روٹ پر ٹرینوں کی آمد و رفت میں خلل واقع ہوا ہے۔ بتایا جاتا ہے کہ رات تقریباً 12:15 بجے نکسلیوں کی ٹیم اس علاقے میں پہنچی اور دھماکہ کر دیا۔ موصولہ اطلاعات کے مطابق یہ واقعہ پول نمبر 334/13 اور 14 کے درمیان پیش آیا ہے۔ واقعہ کی اطلاع ملتے ہی گرڈیہ پولیس کی ٹیم موقع پر پہنچ گئی ہے۔
مزید پڑھیں:۔پولیس کاروائی میں دو نکسلی ہلاک
دوسری جانب اس واقعے کے بعد سے گنگا دامودر، لوک مانیہ تلک ایکسپریس سمیت کئی ٹرینیں مختلف اسٹیشنوں پر رکی ہوئی ہیں جبکہ صورتحال کو معمول پر لانے کی کوششیں فوری طور پر شروع کر دی گئی ہیں، ساتھ ہی پولیس اور سی آر پی ایف کی طرف سے آس پاس کے علاقے میں تلاشی مہم بھی چلائی جا رہی ہے۔
واضح رہے کہ نکسلی تنظیم سی پی آئی-ماؤسٹ کے سرکردہ رہنماء پرشانت بوس اور ان کی بیوی شیلا دی کی گرفتاری کے بعد سے نکسل تنظیمیں ناراض ہیں۔ نکسلی تنظیم کی جانب سے گرفتاری کے بعد دو بار بند کیا جا چکا ہے۔ اس بار دونوں کی رہائی کے مطالبے کے لیے 21 جنوری سے 26 جنوری تک یوم مزاحمت منایا گیا۔ اس دوران گرڈیہ کے کھوکھرا اور مدھوبن میں موبائل ٹاور کو دھماکے سے اڑا دیا گیا۔ ڈمری میں نورنگو کے قریب دریائے برکر پر پل کو دھماکے سے اڑا دیا۔
