تریپورہ تشدد اور توہین رسالت کے خلاف ممبئی میں بند منایا گیا

بند کے پیش نظر مینارہ مسجد اور بھنڈی بازار ناگپاڑہ علاقوں میں ممبئی پولیس کی جانب سے سکیورٹی کا سخت بندوبست تھا۔ اس موقع پر ممبئی کے بھنڈی بازار محمد علی روڈ پر بھی لوگوں نے دوکانیں بند رکھیں اور پرامن طریقے سے احتجاج میں حصہ لیا۔

تریپورہ تشدد اور وسیم رضوی کی جانب سے توہین رسالت کے واقعے کے خلاف ممبئی میں آج مسلمانوں نے ممبئی بند کا اعلان کیا جس کے بعد آج ممبئی کے مسلم اکثریتی علاقوں میں لوگوں نے اپنے کاروبار اور دوکانیں بند رکھیں۔

ممبئی کے بھنڈی بازار محمد علی روڈ پر بھی لوگوں نے دوکانیں بند رکھیں اور پرامن طریقے سے اس احتجاج میں حصہ لیا۔ مینارہ مسجد اور بھنڈی بازار ناگپاڑہ ان علاقوں میں ممبئی پولیس کا بھاری بندوبست تھا۔

رضا اکیڈمی کے صدر سعید نوری نے ای ٹی وی بھارت سے بات کرتے ہوئے کہا کہ وسیم رضوی کو سرکاری پشت پناہی حاصل ہے۔ یہی وجہ ہے کہ اس کی اب تک گرفتاری نہیں ہو پا رہی ہے۔ نوری نے کہا کہ مسلمان سب کچھ برداشت کر سکتا ہے لیکن اپنے نبی اور مذہب کی توہین کبھی برداشت نہیں کر سکتا۔

ہم توہین برداشت نہیں کر سکتے حکومت کو اس پر سنجیدگی سے غور کرنا ہوگا اور خطاکاروں کے خلاف سخت کارروائی کرنی ہوگی۔