علی گڑھ: ایک طالب علم کے لئے تعلیم کے ساتھ کھیل کے میدان میں اعلی کارکردگی کرکے ریاستی و قومی سطح کے مقابلوں میں حصہ لے کر کامیابی حاصل کرنا آسان نہیں ہوتا۔ قومی سطح کے مقابلوں میں کامیابی حاصل کرنے کے لئے کھلاڑی کو تعلیم سے وقت نکال کر روزانہ پانچ سے چھہ گھنٹے میدان میں مشق بھی کرنی ہوتی ہے۔ علیگڑھ مسلم یونیورسٹی میں طلباء و طالبات کی خاصی تعداد ایسی ہے جو تعلیم کے ساتھ کھیل کے میدان میں بھی اعلی کارکردگی کا مظاہرہ کر کے ریاستی، قومی اور بین الاقوامی سطح کے مقابلوں میں حصہ لیتے رہتے ہیں۔Mohd Waris Won Silver Medal
اے ایم یو سے گزشتہ برس گریجویشن کی تعلیم مکمل کرنے والے محمد وارث ملک نے ضلع آگرہ میں منعقد ریاستی گریپلنگ چیمپئن شپ میں گولڈ میڈل حاصل کرنے کے بعد ہریانہ کے سونی پت میں منعقد سینٹر نیشنل گریپلنگ ریسلینگ چیمپئن میں دوسری پوزیشن حاصل کرکے سلور میڈل جیتا۔انہوں نے بتایا کہ حال ہی میں انہوں نے آگرہ میں منعقد 'آٹھوی ریاستی گریپلنگ ریسلینگ چیمپئن شپ' (6 سے 9 اگست) میں جونیئر 70 کلوگرام کیٹیگری کے مقابلے میں گولڈ میڈل حاصل کیا ہے، جس کے بعد اب قومی گریپلنگ ریسلینگ چیمپئن شپ میں سلور میڈل حاصل کیا ہے اور اب بین الاقوامی چیمپئن شپ میں حصہ لے کر یونیورسٹی اور ملک کا نام روشن کروں گا۔