دس ہزار روپئے کے لیے 50 برس کے شخص سے نابالغ کی شادی

ڈی ایس پی نے کہا "نیلور شہر کے کوٹور سے تعلق رکھنے والے ایک 50 برس کے شخص چننا سببیا ایسوکاپلی نے 13 برس کی لڑکی سے شادی کی۔"

آندھراپردیش کے نیلور ضلع میں واقع نیلور دیشا تھانے کے ڈی ایس پی ناگاراجو نے بتایا کہ ایک 50 سالہ شخص نے ایک 13 سال کی لڑکی سے غیر قانونی طور پر شادی کی اور اس کا جنسی استحصال کیا۔

ڈی ایس پی نے کہا "نیلور شہر کے کوٹور سے تعلق رکھنے والے ایک 50 برس کے شخص سببیا ایسوکاپلی کی 13 برس کی لڑکی سے شادی کی۔ شادی کے بعد پہلی رات کی رسم کے نام پر لڑکی کو دھمپور گاوں وداولور منڈل لے جایا گیا جہاں مذکورہ شخص نے لڑکی کے ساتھ جنسی استحصال کیا۔ اس دوران لڑکی نے گھبرا کر چیخ وپکار کی۔ مقامی افراد نے موقع پر پہنچ کر لڑکی کو بازیاب کیا، جس کے بعد پولیس یہاں پہنچ گئی۔ بعد ازیں لڑکی کو آئی سی ڈی ایس ہوم لے جایا گیا۔ ملزم موقع سے فرار ہوگیا۔"

دیشا پولیس نے اس واقعہ پر پوکسو ایکٹ کے تحت کیس درج کیا ہے جو تین دن پہلے پیش آیا تھا۔

مقامی لوگوں کا الزام ہے کہ بچی کی ماں نے اس کی شادی پیسے کے بدلے 50 برس کے شخص سے کی تھی۔ اس خاتون کی سب سے بڑی بیٹی اسپتال میں زیر علاج تھی اور علاج کے لیے اسے دس ہزار روپے ادا کرنا تھا۔ ہسپتال خرچ کی ادائیگی کے لیے اس نے 10 ہزار روپئے رقم لے کر شادی کے لیے رضامندی ظاہر کی ہے۔