Mamata Banerjee on BBC Raid ممتا بنرجی نے موجودہ حکومت کو ہٹلر سے زیادہ خطرناک قرار دیا

وزیر اعلیٰ ممتا بنرجی نے بی جے پی پر نکتہ چینی کرتے ہوئے کہا کہ بی بی سی نے بی جے پی حکومت کے خلاف کچھ ایسا نشر کیا ہے جس کے سبب مرکزی حکومت بی بی سی کے خلاف کارروائی کر رہی ہے۔ Mamata Banerjee On bjp over bbc raid

کولکاتا: مغربی بنگال کی وزیر اعلیٰ ممتا بنرجی نے بدھ کے روز ممبئی اور دہلی میں بی بی سی کے دفتر میں انکم ٹیکس کے سروے پر مرکزی حکومت پر سخت حملہ کیا اور مرکز کو ایڈولف ہٹلر یا نکولائی سیوسیسکو سے زیادہ ڈکٹیٹر قرار دیا۔ ریاستی وزیر خزانہ چندریما بھٹاچاریہ کی جانب سے 2023-24 کا ریاستی بجٹ پیش کرنے کے بعد وزیر اعلیٰ نے اسمبلی سے خطاب کیا۔ اس دوران انہوں نے بی بی سی کے دفاتر میں انکم ٹیکس کے سروے کا حوالہ دے کر بی جے پی کو تنقید کا نشانہ بنایا۔

انہوں نے کہا کہ موجودہ حکومت ہٹلر اور سیوسیسکو سے زیادہ خطرناک ہے۔ بی بی سی نے ہمیشہ درست اور تازہ ترین جانکاری فراہم کی ہے تو پھر ان کے خلاف ایسی کارروائی کیوں ہو رہی ہے؟ بی بی سی نے کچھ نشر کیا ہے جو موجودہ مرکزی حکومت کے خلاف ہے۔ لہٰذا یہ کارروائی انتقامی جذبے سے کی گئی ہے۔ آزادی صحافت کو دبانا انتہائی افسوس ناک ہے۔ میں ہمیشہ آزادی صحافت کی حمایت کرتے ہوں۔ اب صرف عدلیہ ہی اس ملک کو بچا سکتی ہے۔

واضح رہے کہ اس قبل اے آئی ایم آئی ایم کے سربراہ اسد الدین اویسی نے بی جے پی پر نکتہ چینی کرتے ہوئے کہا کہ جب اندرا گاندھی نے ملک میں ایمرجنسی کا اعلان کیا تھا اور اس وقت بی بی سی حکومت سے سوال کررہا تھا تو یہی بی جے پی اُس وقت بی بی سی کی تعریف کر رہا تھا اور اسکی رپورٹنگ اور خبروں کو موزوں قرار دے رہا تھا لیکن آج بی جے پی حکومت بی بی سی کی نیت پر شک کررہی ہے اور اس کے دفاتر پر چھاپے مارے جا رہے ہیں۔ اویسی نے ایکم ٹیکس کی جانب سے بی بی سی کے دفاتر پر چھاپے ماری کی مذمت کی۔