جنوبی افریقہ سے تعلق رکھنے والے مہاتما گاندھی کے پڑپوتے ستیش دھوپیلیا کی اتوار کے روز کورونا وائرس سے موت ہو گئی، وہ 66 برس کے تھے اور ان کی سالگرہ تین دن پہلے تھی، ان کے اہل خانہ نے یہ اطلاع دی۔
دھوپیلیا کی بہن اوما دھوپیلیا مستری نے تصدیق کی کہ ان کے بھائی کی موت کووڈ 19 سے متعلق پیچیدگیوں سے ہوئی ہے، انہوں نے بتایا کہ ان کے بھائی کو نمونیا تھا اور وہ اپنے علاج کے لیے ایک ماہ اسپتال میں رہے تھے جس کے بعد وہ وہاں کورونا کی زد میں آگئے۔
انہوں نے ایک سوشل میڈیا پوسٹ میں کہا ہے کہ 'نمونیا کے ایک ماہ تک تکلیف میں رہنے کے بعد میرے پیارے بھائی گزر گئے، اسپتال میں علاج کے دوران وہ کووڈ 19 کی زد میں آگئے تھے۔'
سوشل میڈیا پر کیے گئے اپنے پوسٹ میں انہوں نے کہا کہ 'انہیں آج شام کو دل کا دورہ پڑا، ان کے کنبہ میں دو بہنیں اوما اور کیرتی مینن ہیں جو یہیں رہتی ہیں۔'
یہ تینوں بہن بھائی منی لال گاندھی کے وارث ہیں، جنہیں مہاتما گاندھی اپنے کاموں کی تکمیل کے لیے جنوبی افریقہ میں ہی چھوڑ کر بھارت لوٹ آئے تھے۔