لکھنؤ: مسجد میں مدنی ہیلتھ کیئر کے ذریعہ سبھی مذاہب والوں کا علاج

آل انڈیا محمدی مشن کے زیر اہتمام لکھنؤ کے بالا گنج علاقے کے آدرش نگر میں واقع غوثیہ جامع مسجد میں مدنی ہیلتھ کیئر کا آغاز کیا گیا۔ اس شفا خانہ کے ذریعے علاقے کے لوگوں کو مفت علاج فراہم کیا جائے گا۔

غوثیہ جامع مسجد میں مدنی ہیلتھ کیئر میں ایک دن کے علاج کی معمولی رقم پندرہ روپے رکھا گیا ہے تاکہ کسی کی عزت نفس کو ٹھیس نہ پہنچے کہ اس نے مفت میں علاج کرایا ہے۔

آل انڈیا محمدی مشن کے اہم ذمہ دار احمد میاں نے ای ٹی وی بھارت سے بات کرتے ہوئے کہا کہ یہ علاقہ انتہائی پسماندہ ہے۔ یہاں پر مزدور طبقہ سے وابستہ افراد کی آبادی ہے۔ غربت کی وجہ سے بیشتر افراد علاج کرانے کے استطاعت میں نہیں ہیں۔ جامع مسجد انتظامیہ اور محمد محمدی مشن نے فیصلہ کیا ہے کہ عوام کو کم سے کم قیمت میں علاج فراہم کیا جائے۔ انہوں نے کہا کہ ہم لوگوں کا ارادہ ہے کہ آگے چل کے پندرہ روپے کی جگہ پانچ روپے مریض سے لیا جائے گا۔

انہوں نے مزید کہا کہ مسجد میں جاری مدنی ہیلتھ کیئر میں سبھی مذاہب کے افراد کا بلاتفریق ملت و مذہب علاج کیا جاتا ہے۔ مسجد رفاہ عام کے لیے تعمیر کی جاتی ہے اور اسی کے مدنظر ہر علاقے کے غریب لوگوں کو علاج فراہم کرنے کے لئے مدنی ہیلتھ کئیر کا افتتاح کیا گیا ہے جہاں پر روزانہ اعلی تعلیم یافتہ ڈاکٹرز مریضوں کا علاج کریں گے۔

انہوں نے بتایا کہ اس کے اخراجات محمدی مشن کے ذمہ دار اور مسجد کمیٹی نے پورا کرنے کا عزم کیا ہے یہاں پر نہ صرف شفاخانہ بلکہ پیھتالوجی کیمپ کا بھی انعقاد کیا جاتا رہے گا تاکہ طبی جانچ کے ذریعہ عوام کی خدمت کی جاسکے۔

وہیں علاقے کے لوگوں میں خوشی کا ماحول ہے سبھی مذاہب کے لوگ یہ مانتے ہیں کہ اس علاقے میں نہ ہی کوئی اعلی تعلیم یافتہ ڈاکٹر تھا اور نہ ہی کوئی ہسپتال تھا۔ جامع مسجد میں مدنی ہیلتھ کئیر کھلنے سے لوگوں کو کم پیسے میں علاج ملے گا۔ اس سے عوام کو بہت بڑی تعداد کو راحت حاصل ہوگی۔

علاج کرنے والے ڈاکٹر کا کہنا ہے کہ اس علاقے میں زیادہ تر جوڑ میں درد نزلہ زکام بخار اور بھوک مری کی شکار مریض پائے جاتے ہیں۔