نئی دہلی: این سی پی لیڈر و لکشدیپ سے رکن پارلیمنٹ محمد فیضل کی لوک سبھا رکنیت بحال کر دی ہے۔ فوجداری معاملے میں 10 سال کی سزا سنائے جانے کے بعد فیضل کی رکنیت منسوخ کر دی گئی تھی۔ ہائی کورٹ نے ان کی سزا پر روک لگا دی تھی لیکن اس کے باوجود ان کی رکنیت بحال نہیں ہو رہی تھی۔ وہیں فیضل نے اس معاملے سے متعلق سپریم کورٹ سے رجوع کیا تھا، تاہم سماعت ہونے سے قبل ہی لوک سبھا سیکریٹریٹ نے ان کی رکنیت بحال کر دی ہے۔
سپریم کورٹ محمد فیضل پی پی کی لکشدیپ پارلیمانی حلقہ کی رکنیت بحال کرنے میں لوک سبھا سکریٹریٹ کی طرف سے مبینہ تاخیر کے خلاف ان کی درخواست پر 28 مارچ کو سماعت ہوئی۔ درخواست گزار محمد فیضل کو 11 جنوری 2023 کو اقدام قتل کے مقدمے میں جرم ثابت ہونے پر 10 سال قید کی سزا سنائی گئی تھی۔ اس کے بعد 13 جنوری کو ان کی رکنیت منسوخ کر دی گئی تھی۔ تاہم، 25 جنوری کو ان کی سزا پر روک لگادی گئی تھی۔
سینئر ایڈووکیٹ اے کے ایم سنگھوی نے عرضی گزار کی طرف سے چیف جسٹس ڈی وائی چندرچوڑ کی سربراہی والی بنچ کے سامنے پیش ہوکر اس معاملے پر جلد سماعت کی درخواست کی تھی۔ ان کے 'خصوصی پیٹیشن کا نوٹس لیتے ہوئے بنچ نے 28 مارچ کو اس کی سماعت کی تاریخ طے کی تھی۔ رکنیت کی بحالی کے تناظر میں سنگھوی نے بنچ کے سامنے کہا کہ سات خطوط لکھ چکے ہیں، لیکن اس سلسلے میں اب تک کوئی کارروائی نہیں کی گئی ہے۔ انہوں نے یہ بھی کہا تھا کہ کیرالہ ہائی کورٹ کی طرف سے ان کی سزا پر روک لگانے کے خلاف لکشدیپ کی یونین ٹیریٹری ایڈمنسٹریشن کی طرف سے دائر مقدمہ منگل کو جسٹس کے ایم جوزف کی سربراہی والی بنچ کے سامنے سماعت کے لیے آسکتا ہے۔ درخواست گزار کی ان گذارشات کو سننے کے بعد، عدالت عظمیٰ نے منگل کو فوری رٹ درخواست کی سماعت کی اجازت دے دی۔
بنچ ابتدائی طور پر اس معاملے کو 5 اپریل کو سماعت کے لیے درج کرنا چاہتی تھی۔ پٹیشنر نیشنلسٹ کانگریس لیڈر نے ایڈوکیٹ کے آر سشی پربھو کے ذریعہ دائر اپنی درخواست میں یہ عرض کیا ہے کہ لوک سبھا سکریٹریٹ 13 جنوری 2023 کے نوٹیفکیشن کو واپس لینے میں ناکام رہا ہے، جس سے انہیں رکن پارلیمنٹ کے طور پر نااہل قرار دیا گیا ہے۔ عرضی میں کہا گیا ہے کہ یہ اس حقیقت کے باوجود ہے کہ درخواست گزار کی سزا (جو کہ نوٹیفکیشن کی بنیاد تھی) پر کیرالہ ہائی کورٹ نے 25 جنوری 2023 کو روک لگا دی تھی اور سپریم کورٹ نے بھی ہائی کورٹ کے حکم پر روک لگانے سے انکار کر دیا تھا۔
یہ بھی پڑھیں :Supreme Court on Mohammed Faizal سپریم کورٹ میں محمد فیضل کی رکنیت کی بحالی پر منگل کو سماعت ہوگی
