Demolition Of Javed Pump Wife's House: جاوید پمپ کی بیوی کے گھر کو منہدم کئے جانے کے خلاف چیف جسٹس کو خط

پریاگ راج میں جاوید پمپ کی بیوی کے گھر کو منہدم کئے جانے کے خلاف چیف جسٹس کو خط بھیجا گیا ہے۔ جس میں الزام عائد کیا گیا ہے کہ انتظامیہ نے جاوید محمد کی اہلیہ پروین فاطمہ کا گھر منہدم کر دیا ہے حالانکہ اس واقعہ سے ان کا کوئی تعلق نہیں ہے۔ Demolition Of Javed Pump Wife's House

پریاگ راج: ریاست اترپردیش کے ضلع پریاگ راج میں گزشتہ جعمہ (10 جون) کو ہوئے تشدد کے بعد پولیس نے کارروائی کرتے ہوئے ملزم جاوید محمد عرف جاوید پمپ کا گھر منہدم کردیا، اس کارروائی کے خلاف الہ آباد ہائی کورٹ کے چیف جسٹس کو ایک خط بھیجا گیا ہے۔ ہائی کورٹ کے چھ وکلاء کی جانب سے چیف جسٹس راجیش بندل کو بھیجے گئے خط کی درخواست میں الزام لگایا گیا ہے کہ انتظامیہ نے جاوید محمد کی اہلیہ پروین فاطمہ کا گھر منہدم کر دیا ہے حالانکہ اس واقعہ سے ان کا کوئی تعلق نہیں ہے۔

درخواست میں کہا گیا ہے کہ یہ گھر جاوید کے نام نہیں بلکہ ان کی اہلیہ پروین فاطمہ کے نام پر ہے۔ یہ گھر پروین فاطمہ کو ان کے والد کی طرف سے شادی سے پہلے تحفے کے طور پر ملا تھا۔ کارروائی میں جاوید محمد کو مالکانہ حقوق نہ ہونے کے باوجود نوٹس دیا گیا اور ان کی اہلیہ کا مکان غیر قانونی طور پر مسمار کر دیا گیا۔ درخواست میں پی ڈی اے کی کارروائی کو غلط قرار دیتے ہوئے کارروائی کا مطالبہ کیا گیا ہے۔ اس کے ساتھ غیر قانونی انہدام کے معاوضے اور قصوروار اہلکاروں کو سزا دینے کا بھی مطالبہ کیا گیا ہے۔

لیٹر پٹیشن بھیجنے والے ایڈووکیٹ کا کہنا ہے کہ ''چار روز قبل تک جاوید پمپ جس کے ساتھ پولیس انتظامیہ کے اہلکار میٹنگ کرتے تھے، اچانک ہنگامہ آرائی کا ماسٹر مائنڈ بنا دیا گیا۔ جاوید کو پولیس نے جمعہ کے واقعہ کے بعد ماسٹر مائنڈ بنایا تھا۔ ایک دن بعد ہفتہ کو پی ڈی اے نے جاوید محمد کے گھر کے باہر مسماری کا نوٹس چسپاں کیا، اس وقت ان کی اہلیہ اور بیٹی بھی پولیس کی حراست میں تھیں۔''

بتا دیں کہ پریاگ راج تشدد کیس کی فہرست میں ملزم جاوید محمد عرف جاوید پمپ کا نام بھی شامل ہے۔ جاوید کا گھر کریلی کے علاقے جے کے آشیانہ میں ہے۔ وہاں بھی پی ڈی اے نے سروے کا کام کیا ہے۔ اس کے ساتھ 37 دیگر افراد کے نام بھی شامل ہیں، جن پر الزام ہے کہ انہوں نے اس واقعہ کو انجام دینے میں اہم کردار ادا کیا تھا۔

نماز جمعہ کے بعد ملک کے کئی شہروں میں نپور شرما کی گرفتاری کا مطالبہ کیا جا رہا ہے، جس کے لیے ملک کے مختلف ریاستوں میں احتجاجی مظاہرے ہو رہے ہیں۔ وہیں ملک کے دیگر حصوں کے ساتھ ساتھ اترپردیش کے کئی شہروں میں بھی نماز جمعہ کے بعد لوگوں نے بڑے پیمانے پر مظاہرے کیے۔ پریاگ راج میں احتجاج کے دوران پولیس اور مظاہرین کے درمیان جھڑپیں بھی ہوئی تھیں۔ اتر پردیش کے شہروں میں ہنگامہ آرائی کے بعد ریاست کے وزیر اعلی یوگی آدتیہ ناتھ نے 'شرپسندوں' کے خلاف سخت کارروائی کی ہدایت دی۔

واضح رہے کہ بی جے پی کی سابق رہنما نپور شرما نے پیغمبر اسلامﷺ پر نا زیبا تبصرہ کیا تھا، جس کے کچھ دن بعد ماحول گرم ہوتا دیکھ بی جے پی نے ترجمان نوپور شرما کو معطل کر دیا ہے، جبکہ دہلی یونٹ کے میڈیا ہیڈ نوین کمار جندال کو بھی نکال دیا گیا۔ لیکن نپور شرما کی اب تک گرفتاری نہیں ہوئی جس کو لیکر ملک کے کئی حصوں میں احتجاجی مظاہرہ ہو رہے ہیں۔