وشاکھا اسٹیل پلانٹ کی نجکاری کے خلاف بائیں بازو کا احتجاج

آندھراپردیش کے وشاکھا اسٹیل پلانٹ کی نجکاری کے لئے مرکزی بجٹ میں کئے گئے اعلان کے خلاف بائیں بازو کی جماعتوں کی جانب سے راستہ روکو احتجاج کیا گیا۔

وشاکھاپٹنم کے مدیلاپالم علاقہ میں یہ راستہ روکو احتجاجی پروگرام منعقد کیا گیا جس میں بائیں بازو کی جماعتوں کے کارکنوں کی کثیر تعداد نے شرکت کی جنہوں نے مرکز کے اس قدم کے خلاف نعرے بازی کی۔

انھوں نے مودی زیرقیادت بی جے پی حکومت سے مطالبہ کیا کہ وہ فوری طور پر اس فیصلے کو واپس لے۔ انہوں نے کہا کہ کئی طرح کی جدوجہد اور تحریک چلانے کے بعد وشاکھاپٹنم میں اسٹیل پلانٹ قائم کیا گیا۔ حکومت، اس تحریک اور قربانیوں کو نظرانداز کرتے ہوئے اس کی نجکاری کا قدم اٹھارہی ہے جو ناقابل قبول ہے۔

اس احتجاج سے علاقہ میں کچھ دیر کے لئے کشیدگی پھیل گئی۔ پولیس نے اس موقع پر سی پی آئی کے رہنماوں اور کارکنوں کی بڑی تعداد کو گرفتار کرلیا۔ اس موقع پر پولیس کے ساتھ ان کی بحث وتکرار بھی ہوگئی۔