مبینہ 'وشوگرو حکومت' پیسے لے کر بھی ٹیکہ مہیا نہیں کرا پارہی ہے: لالو یادو

بہار کے سابق وزیر اعلیٰ لالو پرساد یادو نے کورونا ویکسینیشن کے معاملے پر مرکزی حکومت پر تنقید کرتے ہوئے کہا کہ 'وشوگرو حکومت' پیسے لے کر بھی ٹیکہ مہیا نہیں کرا پارہی ہے جبکہ ہم نے اپنے دور حکومت میں ٹیکہ کاری کا عالمی ریکارڈ بنایا تھا۔

راشٹریہ جنتادل( آرجے ڈی ) کے صدر اور بہار کے سابق وزیراعلیٰ لالو پرساد یادو نے نریندر مودی حکومت پر طنز کرتے ہوئے کہا کہ وشو گرو حکومت اپنے شہریوں سے پیسے لے کر بھی انہیں ٹیکہ مہیا نہیں کرا پارہی ہے جبکہ نوے کی دہائی میں سماجوادی حکومت نے ٹیکہ کاری کا ورلڈ ریکارڈ بنایا تھا۔

لالو پرساد یادو نے ٹویٹر پر وزیراعظم نریندر مودی سے ملک کے تمام شہریوں کو کورونا کا مفت ٹیکہ دیئے جانے کی مانگ کرتے ہوئے کہا کہ سال 1996-97 میں جب ہم سماجوادیوں کی ملک میں جنتادل کی حکومت تھی، جس کا میں قومی صدر تھا تب ہم نے پولیوں ٹیکہ کاری کا ورلڈ ریکارڈ بنایا تھا۔ اُس وقت آج جیسی سہولیات اور بیداری بھی نہیں تھی پھر بھی 07 دسمبر 1996 کو تقریباً 11 کروڑ 74 لاکھ بچوں اور 18 جنوری 1997 کو تقریباً 12 کروڑ 37 لاکھ بچوں کو پولیو کا ٹیکہ دیا گیا تھا۔ وہ بھارت کا عالمی ریکارڈ تھا۔

آرجے ڈی صدر نے مزید کہا کہ اُس دور میں ویکسین کے تئیں لوگوں میں ہچکچاہٹ تھی لیکن جنتادل زیر قیادت سماجوادی حکومت نے عزم مصمم کیا تھا کہ پولیو کو جڑ سے ختم کرکے آنے والی نسلوں کو اس سے آزادی دلائیں گے۔ انہوں نے کہا کہ آج افسوس ہوتا ہے کہ مبینہ 'وشوگرو سرکار' اپنے شہریوں کو پیسے لے کر بھی ٹیکہ دستیاب نہیں کرا پارہی ہے۔

لالو پرساد یادو نے کہا کہ وہ وزیراعظم سے درخواست کرتے ہیں کہ اس جان لیوا وبائی بیماری میں عالم گیر ٹیکہ کاری پروگرام کے تحت پورے ملک کے باشندوں کو مفت ٹیکہ دینے کا اعلان کریں۔ لالو یادو نے ملک میں ٹیکہ کی الگ۔الگ قیمتوں پر بھی سوال کھڑا کئے اور کہا کہ ریاست اور مرکز کی قیمتیں الگ الگ نہیں ہونی چاہئے۔ یہ مرکز کی ذمہ داری ہے کہ ہر ایک شہری کی مکمل ٹیکہ کاری مفت میں ہو۔