وایناڈ: ریاست کیرالہ کے وایناڈ حلقے کے تھروامباڈی میں یونائیٹڈ ڈیموکریٹک فرنٹ (یو ڈی ایف) کے اراکین نے اتوار کو لوک سبھا سے راہل گاندھی کی نااہلی کے تناظر میں مرکزی حکومت کے خلاف مشعل مارچ نکال کر اپنے غم و غصہ کا اظہار کیا۔ راہل گاندھی کی نااہلی کے خلاف پورے حلقے میں کانگریس اور یو ڈی ایف کی جانب سے کئی احتجاجی مارچ نکالے جا رہے ہیں۔کوزی کوڈ میں بھی مسلم یوتھ لیگ نے احتجاجی مارچ نکالا۔ آئی یو ایم ایل کے ریاستی صدر سید صادق علی شہاب تھنگل نے راہل گاندھی کی حمایت میں 'جمہوریت خطرے میں ہے' کے نعرے کے ساتھ جلوس کا افتتاح کیا۔ بتادیں کی ایم وائی ایل کیرالہ کی بڑی سیاسی جماعت آئی یو ایم ایل کا یوتھ ونگ ہے۔ کانگریس نے اتوار کو راہل گاندھی کی لوک سبھا سے نااہلی کے بعد ان کی حمایت میں ایک روزہ ملک گیر سنکلپ ستیہ گرہ شروع کیا۔
کانگریس کے سربراہ ملکارجن کھرگے، جنرل سکریٹری پرینکا گاندھی واڈرا، سینئر رہنما کے سی وینوگوپال، پی چدمبرم اور سلمان خورشید راج گھاٹ پر ستیہ گرہ میں حصہ لینے والے پارٹی کے اعلیٰ افسران میں شامل تھے۔ کانگریس نے ہماچل پردیش، راجستھان اور چھتیس گڑھ سمیت کئی ریاستوں میں مختلف مظاہروں کا اہتمام کیا۔