دہرادون: ریاست اتراکھنڈ کے جوشی مٹھ شہر میں جان و مال کی حفاظت کے لیے حکومت نے ایک بڑا قدم اٹھایا ہے۔ شہر کے تقریباً ڈیڑھ کلومیٹر کے لینڈ سلائیڈنگ سے متاثرہ علاقے کو لینڈ سلائیڈ زون قرار دیا گیا ہے۔ ساتھ ہی اتوار کو یہاں تباہ شدہ مکانات سے 60 سے زیادہ خاندانوں کو بچایا گیا ہے۔ جوشی مٹھ کا جائزہ لینے کے بعد واپس آنے والی ماہرین کی ٹیم کی رپورٹ کی بنیاد پر یہ قدم اٹھایا گیا ہے۔ طویل مدتی حل کے لیے جوشی مٹھ کا باریکی سے جیو ٹیکنیکل اور جیو فزیکل جائزہ لیا جائے گا۔ جن علاقوں میں مکانات میں دراڑیں نہیں ہیں وہاں عمارت کی تعمیر کے لیے ہدایات جاری کی جائیں گی۔ اس کے ساتھ ہی ہائیڈرولوجیکل اسٹڈی کا بھی فیصلہ کیا گیا ہے۔ Joshimath has been declared disaster prone area
گڑھوال کے کمشنر سشیل کمار نے بتایا کہ تباہ شدہ مکانات سے آج 60 خاندانوں کو نکال کر دیگر مقامات پر منتقل کیا گیا اور مزید تقریباً 90 خاندانوں کو نکالنا باقی ہے، انہیں جلد از جلد وہاں سے نکالنا ہوگا۔ کمشنر سشیل کمار نے کہا کہ جوشی مٹھ میں کل 4500 رہائشی عمارتیں ہیں اور ان میں سے 610 میں بڑی دراڑیں پڑ گئی ہیں جس کی وجہ سے وہ رہائش کے قابل نہیں ہیں۔ ابھی بلڈنگ سروے کا کام جاری ہے اور یہ تعداد بڑھ بھی سکتی ہے۔ انہوں نے کہا کہ متاثرہ علاقہ جس میں زیادہ تر مکانات میں پہلے دراڑیں پڑی تھیں اور جن مکانات میں حال ہی میں دراڑیں پڑی ہیں وہ تقریباً ڈیڑھ کلومیٹر تک پھیلے ہوئے ہیں۔ انہوں نے کہا کہ جوشی مٹھ میں ایک طویل عرصے سے زمین گرنے کا عمل آہستہ آہستہ جاری ہے، لیکن پچھلے ایک ہفتے میں اس میں اضافہ ہوا ہے اور گھروں، کھیتوں اور سڑکوں میں بڑی دراڑیں نظر آ رہی ہیں۔