بہار کی حکمراں جماعت جے ڈی یو کے رکن پارلیمان مہا بلی سنگھ دہلی میں ہوئے پرتشدد جھڑپوں کے لیے کانگریس اور خالصتانی کو ذمہ دار ٹھہرایا ہے، مہا بلی سنگھ ضلع روہتاس کے کاراکاٹ سے جے ڈی یو کے رکن پارلیمان ہیں۔
دہلی کے لال قلعے پر ہوئی ہنگامہ آرائی پر اپنا رد عمل ظاہر کرتے ہوئے انہوں نے کہا کہ اس کے پیچھے کانگریس کی سازش ہے اور پنجاب کے خالصتان نواز شرپسندوں کو آگے بڑھاتے ہوئے کسانوں کے نام پر سب کچھ کیا گیا۔
ای ٹی وی بھارت کے ساتھ بات چیت کے دوران مہابلی سنگھ نے کہا کہ کانگریس زرعی قانون کے خلاف کسانوں کی تحریک کو تیز کرنے کا کام کر رہی ہے۔ ان کا کہنا تھا کہ کانگریس نے اپنے منشور میں اس قانون کو لانے کا وعدہ کیا ہے، لیکن کانگریس جو اپنے اصولوں سے ہٹ چکی ہے وہ اب مودی حکومت کی مخالفت کے نام پر ملک کو گمراہ کررہی ہے۔
جے ڈی (یو) کے رکن پارلیمان نے کہا کہ آج بہار میں وزیر اعظم نریندر مودی اور نتیش کمار ترقی کی جو جہت طے کررہے ہیں، ایسی صورتحال میں حزب اختلاف کی جماعتوں کے پاس ایشوز کی کمی ہوگئی ہے، آزادی کے بعد سے اب تک جو کسانوں کے مفاد میں کوئی کام نہیں کرتے تھے، آج وہی لوگ کسانوں کو آگے رکھ کر گھناؤنی سیاست کررہے ہیں۔