جموں کا مولانا آزاد اسٹیڈیم 22 نومبر سے 600 جمناسٹوں کی میزبانی کرے گا

جموں و کشمیر کا مولانا آزاد اسٹیڈیم طویل عرصے کے بعد کھیلوں کی رونق بننے کے لیے تیار ہے۔ درحقیقت اسٹیڈیم میں 22 نومبر سے پانچ روزہ قومی پروگرام کا انعقاد کیا جائے گا، جس میں تقریباً 600 جمناسٹ حصہ لیں گے۔

کورونا وبا کے سبب طویل وقفے کے بعد اسٹیڈیم کا نیا انڈور ہال 56 ویں جونیئر نیشنل آرٹسٹک، 25 ویں ریدمک نیشنل (مرد اور خواتین) جمناسٹک چیمپئن شپ اور کھیلو انڈیا یوتھ گیمز (سلیکشن ٹرائل) مقابلوں کی میزبانی کرے گا ۔ 26 نومبر تک جاری رہنے والے اس مقابلے میں ملک بھر سے تقریباً 26 ٹیمیں حصہ لیں گی۔

جموں و کشمیر جمناسٹک ایسوسی ایشن کے صدر اور جموں و کشمیر اسپورٹس کونسل کے سابق سکریٹری کرن وٹل نے اس بارے میں یو این آئی کو بتایا کہ یہ ریاست میں منعقد ہونے والا یہ ایک بڑا مقابلہ ہوگا، جس میں ملک کے مختلف حصوں سے 600 جمناسٹ حصہ لیں گے۔ جمناسٹک کے لیے فرانس سے منگائے گئے عالمی سطحی انفراسٹرکچر کو چیمپئن شپ کے انعقاد میں استعمال کیا جائے گا۔

انہوں نے کہا، "جے اینڈ کے اسپورٹس کونسل نے اس اقدام کو حقیقت میں بدلنے اور آنے والے مقابلے کے لیے مکمل تعاون فراہم کرنے میں ایک اہم اور نمایاں کردار ادا کیا ہے۔ ایونٹ کے دوران تمام کورونا پروٹوکول لاگو ہوں گے اور شرکاء کو اسٹیڈیم پہنچنے پر کورونا کی نگیٹیو رپورٹ اور کورونا ویکسی نیشن سرٹیفکیٹ دکھانا ہوگا۔ اسی وقت میں کورونا ٹیسٹ کرانے کے لیے پنڈال میں خصوصی بوتھ بھی بنائے جائیں گے۔

خیال رہے کہ اس سے قبل 6-7 نومبر کو 56 ویں جونیئر نیشنل آرٹسٹک، 25 ویں ردمک نیشنل جمناسٹک چیمپئن شپ اور کھیلو انڈیا یوتھ گیمز کے دو روزہ ٹرائلز میں 50 سے زیادہ جمناسٹوں نے حصہ لیا تھا۔
یواین آئی