نئی دہلی: جماعت اسلامی ہند بلقیس بانو جنسی زیادتی مقدمے میں ملوث قصورواروں کی رہائی پر اپنی ناراضگی کا اظہار کرتی ہے، سات افراد کے قتل اور جنسی زیادتی کے قصورواروں کی رہائی کو یقینی بنانے میں گجرات حکومت کے کردار کی مذمت کرتی ہے۔ ان خیالات کا اظہار آج جماعت اسلامی ہند کی ماہانہ پریس کانفرنس میں نائب امیر جماعت اسلامی ہند انجینئر محمد سلیم نے کیا۔ Jamate e Islami Hind On Bilkis Bano convicts
انہوں نے کہا کہ ایسے فیصلوں سے کسی مخصوص حلقے کی خوشنودی حاصل کرنا مقصود ہوتا ہے جو قطعی ناقابل قبول ہے۔ جماعت اسلامی ایسے فیصلے کی مذمت کرتی ہےاوراس امید کا اظہار کرتی ہے کہ سپریم کورٹ اس معاملے میں مداخلت کرے گی تاکہ ’معافی پالیسی‘ کی آڑ میں کی گئی اس سنگین ناانصافی کا خاتمہ ہو۔
نائب امیرجماعت نے کہا کہ 'معافی پالیسی کا اطلاق چھوٹے جرائم کے سبب جیلوں میں بند مجرموں پر ہونا چاہئے نہ کہ جنسی زیادتی اور قتل جیسے گھناؤنے جرائم کو انجام دینے والوں کے لئے لئے۔ اگر ریاستی حکومتوں کو جنسی زیادتی اور قتل جیسے گھناؤنے جرائم میں سزایافتہ ہونے کے باوجود 'معافی پالیسی' کے تحت اپنی پسند کے مجرموں کو رہا کرنے کی اجازت دی جاتی ہے تو ہمارا انصاف کی فراہمی کا نظام مذاق بن جائے گا۔ اس سے مجرموں اور ان کے ماسٹر مائنڈ کو حوصلہ ملے گا اور انہیں گھناؤنے جرائم کاارتکاب کرنے کے باوجود جلد یا دیر سے سسٹم کے ذریعہ رہا ہونے کا یقین ہوگا۔
انہوں نے مزید کہاکہ جماعت اسلامی ہند صدر جمہوریہ سے اپیل کرتی ہے کہ وہ اس معاملے میں مداخلت کریں اور وزیر اعظم اور وزیر داخلہ کے توسط سے گجرات حکومت کو ان مجرموں کی رہائی کے فیصلے کو واپس لینے کی ہدایت دیں تاکہ نظام عدل اور قانون کی بالادستی کو مفلوج اور بے اثر ہونے سے بچایا جاسکے۔