جے شنکر کی برطانیہ کے نئے وزیر خارجہ کیمرون سے ملاقات

برطانیہ میں آئندہ برس ہونے والے انتخابات سے قبل کابینہ میں بڑے پیمانے پر ردوبدل کیا گیا ہے۔ سابق وزیراعظم ڈیوڈ کیمرون کو وزیر خارجہ بنا دیا گیا ہے۔ وزیر خارجہ جے شنکر، جو اس وقت برطانیہ کے دورے پر ہیں، نے ان سے ملاقات کرکے مبارکباد دی اور مغربی ایشیا کی صورتحال، روس یوکرین تنازعہ اور ہند بحرالکاہل خطے پر تبادلہ خیال کیا۔ jaishankar meets Cameron

لندن: وزیر خارجہ ایس جے شنکر نے پیر کو برطانیہ کے نئے وزیر خارجہ ڈیوڈ کیمرون سے ملاقات کی اور دو طرفہ اسٹریٹجک شراکت داری پر تفصیلی بات چیت کی۔ یہ ملاقات برطانوی وزیر اعظم رشی سنک کی جانب سے اگلے سال ہونے والے عام انتخابات سے قبل کابینہ میں ردوبدل کرتے ہوئے سابق وزیر اعظم کیمرون کو نیا وزیر خارجہ مقرر کرنے کے چند گھنٹے بعد ہوئی ہے۔

قابل ذکر ہے کہ رشی سنک کے کابینہ میں یہ ردوبدل ایک ایسے دن ہوا جب سبکدوش ہونے والے وزیر خارجہ جیمز کلیورلی جے شنکر کے ساتھ دو طرفہ بات چیت کرنے والے تھے۔ جے شنکر اس وقت پانچ روزہ سرکاری دورے پر برطانیہ میں ہیں۔ جے شنکر نے اتوار کو برطانوی وزیراعظم رشی سنک کے ساتھ وزیر اعظم کی رہائش گاہ اور دفتر 'ٹین ڈاؤننگ سٹریٹ' میں چائے پر بات چیت کی تھی۔

جے شنکر نے ایکس پر ایک پوسٹ میں کہا، 'برطانوی وزیر خارجہ ڈیوڈ کیمرون سے آج دوپہر کو ان کی تقرری کے پہلے ہی دن ملاقات کرکےخوشی ہوئی اور ان کو مبارکباد دی۔ دونوں ممالک کے درمیان اسٹریٹجک پارٹنرشپ پر تبادلہ خیال کیا۔

جے شنکر نے کہا کہ انہوں نے کیمرون کے ساتھ مغربی ایشیا کی صورتحال، روس یوکرین تنازعہ اور ہند بحرالکاہل خطے پر بھی تبادلہ خیال کیا۔ جے شنکر نے یہ بھی کہا کہ ان کے ساتھ کام کرنے کے لیے بے چین ہیں۔ واضح رہے کہ ڈیوڈ کیمرون 2010 سے 2016 تک برطانیہ کے وزیر اعظم رہے اور 2005 سے 2016 تک کنزرویٹو پارٹی کی قیادت کی۔