India Chairs UNSC: بھارت نے اقوام متحدہ سلامتی کونسل کی صدارت سنبھالی

اقوام متحدہ کی سلامتی کونسل(یو این ایس سی) کی کمان آج سے بھارت کے ہاتھ میں آگئی ہے۔ بھارت ایک ماہ کے لیے یو این ایس سی کی صدارت کرے گا۔ نریندر مودی پہلے بھارتی وزیراعظم ہوں گے جو سلامتی کونسل کے اجلاس کی صدارت کریں گے۔

بھارت نے اتوار(آج) سے اقوام متحدہ کی سلامتی کونسل کی صدارت سنبھالی ہے۔ اگست 2021 میں سلامتی کونسل کی صدارت بھارت کے پاس ہوگی۔ اقوام متحدہ میں بھارتی نمائندے ٹی ایس تیرو مورتی نے بتایا کہ اس دوران بھارت تین اعلیٰ سطحی اجلاس منعقد کرنے جارہا ہے۔ جس میں میری ٹائم سکیورٹی، امن قائم کرنے اور انسدادِ دہشت گردی جیسے امور پر تبادلہ خیال کیا جائے گا۔

اقوام متحدہ سلامتی کونسل

اس کے ساتھ ہی اقوام متحدہ میں بھارت کے سابق نمائندے سید اکبر الدین نے کہا کہ 75 برسوں میں پہلی بار ہماری سیاسی قیادت نے یو این ایس سی کے ایک ایونٹ کی صدارت کرنے میں دلچسپی ظاہر کی ہے اور یہ ظاہر کرتا ہے کہ لیڈر شپ اب فرنٹ سے قیادت کرنا چاہتی ہے۔

انہوں نے بتایا کہ سلامتی کونسل میں یہ بھارت کی 8ویں مدت ہے۔ 'نریندر مودی پہلے ہندوستانی وزیراعظم ہوں گے جو سلامتی کونسل کے کسی بھی اجلاس کی صدارت کریں گے۔ اس سے قبل سنہ 1992 میں اُس وقت کے وزیر اعظم پی وی نرسمہا راؤ نے سلامتی کونسل کے اجلاس میں شرکت کی تھی۔ انہوں نے کہا کہ اگرچہ یہ ایک ورچوئل میٹنگ ہوگی لیکن یہ ہمارے لیے تاریخی ہے۔

واضح رہے کہ اقوام متحدہ کی سلامتی کونسل 15 ممالک پر مشتمل ہے جس کے 5 مستقل اور 10 غیر مستقل ارکان ہیں۔ مستقل ممالک چین، فرانس، روس، برطانیہ اور امریکہ ہیں جب کہ بھارت اس کا غیر مستقل رکن ہے۔ بھارت کو غیر مستقل رکن کی حیثیت سے دو سال کی مدت ملی ہے جو کہ یکم جنوری 2021 سے شروع ہوئی ہے۔

اتوار یعنی یکم اگست سے بھارت نے سلامتی کونسل کے صدر کی کمان سنبھال لی ہے جو ایک ماہ تک جاری رہے گی۔

واضح رہے کہ ہر ماہ انگریزی الفابیٹ کے لحاظ سے ایوان کی صدارت تبدیل ہوتی ہے اور اس لحاظ سے اب بھارت کو دسمبر 2022 میں دوبارہ صدارت کا موقع مل سکے گا۔