برطانیہ میں کورونا وائرس کی نئی قسم کی دریافت نے پوری دنیا کو تشویش میں مبتلا کر دیا ہے۔ کورونا کے اس نئے اسٹرین کو سپر اسپریڈر قرار دیا جا رہا ہے۔ اس کی وجہ سے برطانیہ میں کورونا کے معاملوں میں تیزی سے اضافہ ہوا ہے۔
اسی کے پیش نظر ہندوستان نے برطانیہ سے آنے والی سبھی پروازوں کو معطل کر دیا ہے۔ اس سے قبل کئی دوسرے ملکوں نے بھی برطانیہ سے آنے والی پروازون پر پابندی لگا دی ہے۔
وزارتِ شہری ہوا بازی نے ایک بیان جاری کر کے کہا ہے کہ برطانیہ میں موجودہ صورتحال کے پیش نظر بھارتی حکومت نے فیصلہ کیا ہے کہ وہاں سے بھارت آنے والی سبھی پروازوں کو عارضی طور پر 31 دسمبر کو 11:59 بجے تک لیے معطل کردیا جائے گا۔ معطلی کا یہ فیصلہ 22 دسمبر کو 11.59 بجے سے نافذ ہوگا۔
اس سے قبل دہلی کے وزیر اعلی اروند کیجریوال اور راجستھان کے وزیر اعلی اشوک گہلوت نے برطانیہ سے آنے والی سبھی پروازوں پر پابندی لگانے کا مطالبہ کیا تھا۔
اروند کیجریوال نے مرکزی حکومت سے برطانیہ سے آنے والی پروازں پر فوری طور پر پابندی عائد کرنے کی درخواست کی تھی۔ انہوں نے ایک ٹویٹ میں لکھا تھا کہ ملک میں کورونا کے مسلسل بڑھتے معاملوں میں برطانیہ کی وجہ سے مزید تیزی آ سکتی ہے۔ ایسے میں مرکزی سرکار کو فوری اثر کے ساتھ برطانیہ سے آنے والی پروازوں پر پابندی لگانی چاہیے۔