Corona Update: بھارت میں کورونا کے 38،353 نئے کیسز، 497 اموات درج

بھارت میں گزشتہ 24 گھنٹوں میں کورونا کے 38،353 نئے کیسز کی تصدیق ہوئی ہے اور497 اموات انفیکشن کی وجہ سے ہوئی ہیں۔ وزارت صحت کے مطابق صحت یابی کی شرح بڑھ کر 97.45 فیصد ہوگئی ہے۔

مرکزی وزارت صحت کی جانب سے بدھ کی صبح جاری کردہ تازہ ترین اعداد و شمار کے مطابق گزشتہ 24 گھنٹوں کے دوران ملک میں کورونا وائرس کے 38،353 نئے کیسز سامنے آئے ہیں۔ جب کہ اس انفیکشن سے 497 اموات ہوئیں ہیں۔

وہیں رپورٹ میں بتایا گیا ہے کہ مریضوں کی صحت یابی کی رفتار بڑھ گئی ہے اور صحت یابی کی شرح 97.45 فیصد ہوگئی ہے۔

ممکنہ تیسری لہر کے پیشِ نظر ویکسینیشن مہم کو بھی تیز کیا جارہا ہے۔ ریاستوں اور مرکز کے زیرِ انتظام علاقوں کو اب تک 51,90,80,524 ویکسین کی خوراکیں فراہم کی جاچکی ہیں۔

وہیں کل یعنی 10 اگست کو کورونا کے 28،204 نئے کیسز درج کیے گئے تھے۔ جب کہ اس وبا سے 373 افراد ہلاک ہوگئے تھے۔ ان نئے کیسز کے ساتھ پچھلے 24 گھنٹوں میں 41،511 مریض صحت یاب ہوئے۔ اس کے ساتھ ہی ریاستوں میں جانچ کے عمل کو بھی تیزی سے بڑھایا جارہا ہے۔

واضح رہے کہ آئی سی ایم آر کے مطابق 10 اگست تک 48،50،56،507 نمونوں کی جانچ کی گئی، جن میں منگل تک 17،77،962 ٹیسٹ شامل ہیں۔