بھارت نے کشمیر پر او آئی سی کے تبصرے کو مسترد کیا

وزارت خارجہ نے ایک بیان میں کہا "ہم او آئی سی کے جنرل سیکریٹریٹ کی طرف سے جموں و کشمیر کے تعلق سے کیے گئے تبصرے کو مسترد کرتے ہیں اور مرکز کے زیر انتظام علاقے جموں و کشمیر سے متعلق معاملات میں او آئی سی کو کچھ بھی کہنے کا کوئی حق نہیں ہے۔

بھارت نے جمعرات کے روز تنظیم تعاون اسلامی (او آئی سی) کی جانب سے جموں و کشمیر کے تعلق سے کیے گئے تبصرے کو مسترد کردیا اور نصیحت بھی کہ کہ اسے بھارت کے اندرونی معاملات کے بارے میں کچھ بھی کہنے کا کوئی حق نہیں ہے۔

وزارت خارجہ کے ترجمان ارندام باغچی نے میڈیا کے سوال پر کہا ’’ ہم او آئی سی کے سیکریٹری جنرل کی طرف سے جموں و کشمیر کے تعلق سے کیے گئے تبصرے کو مسترد کرتے ہیں۔ او آئی سی کو جموں و کشمیر کے تعلق سے کچھ بھی کہنے کا کوئی حق نہیں ہے جو بھارت کا لازمی حصہ ہے‘‘۔

باغچی نے کہا کہ ہم اس بات کا اعادہ کرتے ہیں کہ او آئی سی سیکریٹریٹ کو اپنے فورم کا کچھ ذاتی مفادات کے لیے بھارت کے اندرونی معاملات پر تبصرہ کرنے کے لیے غلط استعمال کی اجازت دینے سے گریز کرنا چاہیے۔

واضح رہے کہ او آئی سی نے حکومت ہند سے اگست 2019 میں جموں و کشمیر کے حوالے سے لیے گئے فیصلوں کو منسوخ کرنے کا مطالبہ کیا تھا۔